पुणे, ता. ४ : चाकण आणि म्हाळुंगे परिसरात बेकायदेशीर व विनापरवाना ताडी विक्री सर्रास सुरू आहे. या बनावट ताडीमध्ये घातक रसायनांचा वापर केल्यामुळे नागरिकांच्या आरोग्याला धोका निर्माण झाला आहे. या संदर्भात रिपब्लिकन प्रेसिडियम पार्टी ऑफ इंडियाकडे स्थानिक नागरिकांनी तक्रारी दाखल केल्या असून, प्रशासन आणि उत्पादनशुल्क विभाग याकडे जाणीवपूर्वक दुर्लक्ष करत असल्याचा आरोप करण्यात आला आहे. याबाबत पक्षाचे राष्ट्रीय अध्यक्ष राज भोकरे आणि समन्वयक सल्लागार अविराज मराठे म्हणाले की, बेकायदेशीर ताडीविक्री अड्डे गेली अनेक वर्षे सर्रास सुरू आहेत. उत्पादन शुल्क विभागाचे अधिकारी या प्रकाराकडे दुर्लक्ष करत असून, यामागे संगनमताची शक्यता नाकारता येत नाही. अशा बनावट ताडीमुळे नागरिकांचे आरोग्य धोक्यात आले आहे. त्यामुळे प्रशासनाने संबंधित अधिकारी आणि बनावट ताडी विक्रेत्यांवर कठोर कायदेशीर कारवाई करावी, अशी मागणी पक्षाच्या वतीने केली आहे.