पुणे, ता. २६ : राष्ट्रवादी काँग्रेस पक्षाकडून राज्यभरात ‘मंगल कलश रथयात्रा’ काढण्यात येणार आहे. ही रथयात्रा मंगळवारी (ता. २९) पुण्यात येणार असून, रथयात्रेचे जल्लोषात स्वागत करण्यात येणार आहे.

राष्ट्रवादी काँग्रेसतर्फे मुंबईत ६५व्या महाराष्ट्रदिनानिमित्त एक ते चार मे दरम्यान ‘गौरवशाली महाराष्ट्र महोत्सव’ आयोजित केला आहे. या महोत्सवांतर्गत पक्षाकडून राज्यभरात ‘मंगल कलश रथयात्रा’ काढली जाणार आहे. या रथयात्रेच्या स्वागताच्या तयारीसाठी शनिवारी बैठक पार पडली. या वेळी शहराध्यक्ष दीपक मानकर, प्रदीप देशमुख, राजलक्ष्मी भोसले यांच्यासह पदाधिकारी उपस्थित होते. रथयात्रेचा प्रारंभ कोल्हापूर येथे झाला आहे. रथयात्रा मंगळवारी (ता. २९) सायंकाळी सासवडमार्गे पुण्यात येणार आहे. हडपसर येथे साने गुरुजी भवन येथे या यात्रेला सुरुवात होणार असल्याचे देशमुख यांनी सांगितले.