म्हाडाची इमारत मोडकळीस; पुनर्विकासासंदर्भात महापालिकेकडून टाळाटाळ

पुणे, ता. ४ : येरवडा येथील महाराष्ट्र हाउसिंग बोर्ड सोसायटीमधील ‘आदित्य नारायण सहकारी गृहरचना सोसायटीतील एम-२४’ ही इमारत अत्यंत जीर्ण आणि धोकादायक झाली आहे. गेल्या १५ वर्षांपासून इमारत मोडकळीस आली असून, इमारतीच्या पुनर्विकासासंदर्भात महापालिकेकडून वारंवार टाळाटाळ केली जात आहे. अनेकदा प्रयत्न करूनही प्लॅन मंजुरीची प्रक्रिया प्रलंबित असल्याने रहिवाशांमध्ये असंतोष निर्माण झाला आहे.
सोसायटीच्या पदाधिकाऱ्यांनी दिलेल्या माहितीनुसार, एम-२४ ही इमारत ४० वर्षांपूर्वी बांधली आहे. गेल्या १५ वर्षांपासून ती मोडकळीस आली आहे. यामुळे येथील अनेक कुटुंबे इमारत सोडून इतर ठिकाणी राहण्यासाठी गेली आहेत, तर ३६ कुटुंबांतील २५० नागरिक जीव मुठीत धरून राहत आहेत. सोसायटीने पुनर्विकासासाठी म्हाडा पुणे, एअर फोर्स, उपनिबंधक कार्यालय, अग्निशामक दल यांच्याकडून ‘ना हरकत प्रमाणपत्रे’ मिळवली आहेत. याशिवाय स्ट्रक्चरल ऑडिट, माती परीक्षण आणि पर्यावरण अहवाल या सर्व आवश्यक बाबींची पूर्तता करूनही महापालिकेतर्फे एक वर्षापासून बांधकाम मंजुरीसाठी विलंब होत आहे.
सोसायटीचे सचिव राजेश बागमार आणि अध्यक्ष प्रशांत खंडाळे यांनी सांगितले की, ‘‘महापालिकेच्या बांधकाम विभागाला यासंदर्भात वारंवार निवेदने दिली आहेत. मात्र बांधकामास मंजुरी देण्याऐवजी, रहिवाशांना घरे सोडून जाण्यासाठी नोटीस पाठविल्या आहेत, जे अत्यंत दुर्दैवी आहे. या इमारतीत ७० ते ८० वर्षांचे वृद्ध नागरिक राहत असून, त्यांच्या राहण्याची कोणतीही पर्यायी व्यवस्था प्रशासनाकडून केली जात नाही.’’