पुणे, ता. ५ ः शेतकऱ्यांच्या परदेशी अभ्यास दौऱ्याच्या योजनेच्या नावाखाली पैसे भरण्याची मागणी होत असल्याचे प्रकार घडत आहेत. समाजमाध्यमावरून अशा प्रकारच्या पोस्ट पसरविल्या जात आहेत. कोणत्याही व्यक्ती, संस्था किंवा प्रवासी कंपनीकडे पैसे भरू नयेत, असे कृषी विभागाकडून स्पष्ट करण्यात आले आहे.
राज्यातील शेतकऱ्यांना विदेशातील आधुनिक शेती तंत्रज्ञानाची ओळख प्रत्यक्ष करून देण्याच्या उद्देशाने कृषी विभागामार्फत राज्यातील शेतकऱ्यांचे देशाबाहेरील अभ्यास दौरे ही योजना राबविण्यात येत आहे. या योजनेंतर्गत इच्छुक शेतकऱ्यांना तालुका कृषी अधिकारी कार्यालयात अर्ज सादर करावे लागणार आहेत. त्यानुसार जिल्हा स्तरावर सोडत प्रक्रियेद्वारे शेतकऱ्यांची निवड अंतिम करण्यात येणार आहे. जिल्हा स्तरावर शेतकऱ्यांची निवड झाल्यानंतर जिल्हा अधीक्षक कृषी अधिकारी कार्यालयामार्फत संबंधित शेतकऱ्यांना निवड झाल्याबाबतची माहिती देण्यात येईल. शेतकरी निवड झाल्यानंतर कृषी आयुक्तालयामार्फत दौऱ्यांचे आयोजन केले होणार आहे. या योजनेत प्रती शेतकरी अनुदान हे एकूण दौरा खर्चाच्या ५० टक्के किंवा जास्तीतजास्त एक लाख रुपये एवढे दिले जाते. त्यानुसार निवड झालेल्या शेतकऱ्यांनी कृषी विभागामार्फत सूचना मिळाल्यानंतरच शासन अनुदानाची रक्कम वगळून इतर रक्कम दौरा खर्च म्हणून भरणा करायची असल्याचे कृषी विभागाकडून सांगण्यात आले.
-----------
शेतकरी परदेश अभ्यास दौरा योजनेची नक्कल केल्याचा प्रकार उघडकीस आला आहे. समाजमाध्यमांतून या योजनेबद्दल दिशाभूल करणारी माहिती प्रसारित करण्यात येत आहे. शेतकऱ्यांनी कोणत्याही व्यक्तीस, संस्थेस आणि प्रवासी कंपनीस पैसे देऊ नयेत.
- रफीक नाईकवडी, विस्तार संचालक, कृषी विभाग