पुणे, ता. ६ : किरण सोशल फाउंडेशनच्या वतीने प्रथम वर्धापनदिनानिमित्त सामाजिक संस्थांचा गौरव आणि विद्यार्थी शिष्यवृत्ती प्रदान कार्यक्रमाचे आयोजन धायरी फाटा येथील सिल्व्हर पेटल्स हॉल येथे करण्यात आले होते. या वेळी ज्येष्ठ शिक्षणतज्ज्ञ प्राचार्य डॉ. सुधाकरराव जाधवर व डॉ. मिलिंद भोई हे प्रमुख पाहुणे म्हणून उपस्थित होते. फाउंडेशनचे अध्यक्ष विपुल म्हैसूरकर, उपाध्यक्ष रवींद्र सरवदे, ऋचा देशपांडे, सुशांत बरकडे, दीपाली पाटील, नीलेश कुलकर्णी, अतुल धुमाळ आदी उपस्थित होते.
समाजातील विविध घटकांसाठी काम करणाऱ्या सेवाधाम वृद्धाश्रम, ज्ञानगंगोत्री प्रतिष्ठान, जिव्हाळा फाउंडेशन, अद्वैत परिवार, पुणे विद्यार्थी गृह या सामाजिक संस्थांचा सन्मान या वेळी करण्यात आला. तसेच दहावीतील गरजू विद्यार्थ्यांना ‘स्वर्गीय इंदिराबाई रामचंद्र म्हैसूरकर शिष्यवृत्ती’, तर बारावीतील गरजू विद्यार्थ्यांना ‘स्वर्गीय पुतळाबाई नामदेव सरवदे शिष्यवृत्ती’ प्रदान करण्यात आली. म्हैसूरकर यांनी प्रास्ताविक केले. ऋचा देशपांडे यांनी सूत्रसंचालन केले.