पुणे, ता. ६ ः खराडी येथील हॉटेल स्टेबर्डमध्ये झालेल्या अमली पदार्थ पार्टीतील आरोपी डॉ. प्रांजल खेवलकरसह अन्य आरोपींची सखोल चौकशी करावी, असे आदेश राज्य महिला आयोगाने पुणे पोलिसांना दिले आहेत.
पुणे पोलिसांच्या गुन्हे शाखेने गेल्या महिन्यात खराडीतील हॉटेलवर छापा टाकला होता. या कारवाईत पोलिसांनी गांजा आणि कोकेन असे अमली पदार्थ जप्त केले होते. याप्रकरणी राष्ट्रवादी काँग्रेस शरदचंद्र पवार पक्षाचे नेते एकनाथ खडसे यांचे जावई डॉ. प्रांजल खेवलकर (वय ४१, रा. इंद्रप्रस्थ सोसायटी, हडपसर), निखिल जेठानंद पोपटाणी (वय ३५, रा. डीएसके सुंदरबन, माळवाडी), समीर फकीर महंमद सय्यद (वय ४१, ऑर्किड सोसायटी, एनआयबीएम रस्ता, कोंढवा), सचिन सोनाजी भोंबे (वय ४२, डायमंड पार्क सोसायटी, वाघोली) आणि श्रीपाद मोहन यादव (वय २७, रा. पंचतारानगर, आकुर्डी) यांच्यासह दोन तरुणींना अटक करण्यात आली होती. या प्रकरणातील सात आरोपी हे सध्या येरवडा कारागृहात न्यायालयीन कोठडीत आहेत. डॉ. खेवलकर वेगवेगळ्या मित्र व मैत्रिणींसह गेल्या दीड वर्षात ४३ दिवस या हॉटेलमध्ये राहिला आहे, असे पोलिस तपासातून पुढे आले आहे.
या प्रकरणात राज्य महिला आयोगाला सानवी बहुउद्देशीय सेवाभावी संस्थेकडून तक्रार देण्यात आली आहे. या हॉटेलमध्ये परप्रांतीय तरुणींना आमिष दाखवून बोलावल्याचे दिसून येत आहे. संघटित गुन्हेगारी, तसेच मानवी तस्करी प्रकरण असल्याचा आरोप संबंधित संस्थेने राज्य महिला आयोगाला दिलेल्या पत्राद्वारे केला आहे. या प्रकरणाची सखोल चौकशी करण्यात यावी, अशी मागणी पत्राद्वारे केली आहे. आयोगाने या अर्जाच्या अनुषंगाने पुणे पोलिसांना या प्रकरणाची अनैतिक मानवी तस्करी प्रतिबंधक विभाग आणि सायबर विभागाकडून या प्रकरणाची तातडीने चौकशी करून कारवाई करण्याचे आदेश दिले आहेत.

‘‘खराडीतील पार्टी प्रकरणात महिला आयोगाचे पत्र पोलिसांना मिळाले आहे. त्याअनुषंगाने चौकशी करण्यात येणार आहे. पोलिसांनी केलेल्या कार्यवाहीचा अहवाल आयोगास देण्याचे आदेश देण्यात आले आहेत.
- अमितेश कुमार, पोलिस आयुक्त