पुणे, ता. ६ ः शेअर ट्रेडिंगमध्ये गुंतवणूक केल्यास जादा परतावा मिळवून देण्याचे आमिष दाखवून सायबर चोरट्यांनी एकाची २३ लाख ६५ हजारांची ऑनलाइन फसवणूक केली आहे. ही घटना डिसेंबर २०२४ ते मार्च २०२५ दरम्यान घडली. या प्रकरणी माळवाडी परिसरात राहणाऱ्या एकाने हडपसर पोलिस ठाण्यात फिर्याद दाखल केली आहे. त्यानुसार मोबाईलधारक व विविध बँकधारकांवर हडपसर पोलिस ठाण्यात गुन्हा दाखल केला आहे.
पोलिसांनी दिलेल्या माहितीनुसार, तक्रारदार हे माळवाडीत राहायला असून १५ डिसेंबर २०२४ रोजी सायबर चोरट्यांनी त्यांना संपर्क केला. शेअर ट्रेडिंगमध्ये गुंतवणूक केल्यास जादा परतावा देण्याची बतावणी त्यांना केली. त्यांचा विश्वास संपादित करून चोरट्यांनी १० मार्च २०२५ पर्यंत त्यांच्या बँकखात्यातून २३ लाख ६५ हजार रुपये वर्ग करण्यास भाग पाडले आहे. दरम्यान, परतावा न मिळाल्यामुळे फसवणूक झाल्याचे तक्रारदाराच्या लक्षात आले. त्यानंतर त्यांनी पोलिस ठाण्यात धाव घेत तक्रार दाखल केली. याप्रकरणी पोलिस निरीक्षक नीलेश जगदाळे तपास करीत आहेत.