पुणे, ता. ६ ः पुणे महापालिका आयुक्तांच्या बंगल्यातून एसी, झुंबर यासह अनेक वस्तू गायब झाल्या आहेत. याप्रकरणी महापालिका आयुक्त नवलकिशोर राम यांनी शहर अभियंता प्रशांत वाघमारे यांना चौकशी करण्याचे आदेश दिले आहेत. त्यामुळे या चौकशीतून आता नेमके काय बाहेर येणार याकडे लक्ष लागले आहे.

मॉडेल कॉलनी येथे महापालिका आयुक्तांसाठी सुसज्ज बंगला बांधलेला आहे. यापूर्वीचे आयुक्त डॉ. राजेंद्र भोसले हे सेवानिवृत्त झाल्यानंतर त्यांनी बंगला सोडला. त्यानंतर महापालिकेचे अधिकारी बंगल्यात गेल्यानंतर त्यांना बंगल्यातील चार एससी, दोन टीव्ही, झुंबर, जुन्या काळातील महागडे पितळी दिवे, कॉफी मशिन, किचन टॉप, वॉकी टॉकी, रिमोट बेल्स असे लाखो रुपयांचे साहित्य गायब झाले असल्याचे समोर आले. या वस्तू कुठे गेल्या याचा तपास प्रशासनाने केला नाही. आयुक्त बंगल्यात २४ तास कडक बंदोबस्त असताना या वस्तू गेल्या कुठे? असा प्रश्‍न निर्माण झाला. अखेर माध्यमांनी हा प्रकार चव्हाट्यावर आणल्यानंतर याचे जोरदार पडसाद उमटले आहेत. ही माहिती बाहेर गेलीच कशी? यावरून वरिष्ठ अधिकाऱ्यांनी कनिष्ठ अधिकाऱ्यांना जाब विचारला आहे.

सजग नागरिक मंचाचे अध्यक्ष विवेक वेलणकर म्हणाले, ‘‘आयुक्तांच्या निवासस्थानातील वस्तूंची चोरी होते ही बाब धक्कादायक आहे. आयुक्तांचा बंगलाच सुरक्षित नसेल तर सामान्य नागरिकांचे काय ? त्यामळे महापालिकेने पोलिसांकडे तक्रार दाखल करावी. याची सीआयडी चौकशी झाली पाहिजे.’’

माहिती अधिकार कार्यकर्ते विजय कुंभार म्हणाले, ‘‘हे प्रकरण दडपण्यासाठी मालमत्ता व्यवस्थापन व भवन विभाग प्रयत्न करत आहे. महागड्या वस्तू गायब झाल्यानंतर नव्याने वस्तू घेतल्या जात आहेत. त्यामुळे या प्रकरणात महापालिकेने गुन्हा दाखल केला पाहिजे.’’
--------------

आयुक्त बंगल्यात किती साहित्य आहे हे तपासणे भवन विभागाची जबाबदारी आहे. मी येण्यापूर्वी तेथे काय साहित्य होते हे मला माहीत नाही. त्यामुळे याची चौकशी करण्यासाठी शहर अभियंता प्रशांत वाघमारे यांना आदेश दिले आहेत. आयुक्तांच्या घरात चोरी झाली हेही चुकीचे आहे. आम्ही अधिकृतपणे कोणतीही माहिती दिली नाही. ही चुकीची माहिती कशी बाहेर गेली, याची चौकशी करत आहोत. २० लाखांचे नवीन साहित्य घेतले जात आहे, याबाबतही मी अनभिज्ञ आहे. येथील साहित्याची जबाबदारी भांडार विभागाची आहे.
- नवलकिशोर राम, आयुक्त, पुणे महापालिका