पुणे, ता. १९ : ‘‘भारत हा ज्ञानाचे भंडार आहे. विज्ञान-तंत्रज्ञान विषयातील शाखांच्या अभ्यासासाठी संस्कृतची मदत होऊ शकते. मात्र, हा अभ्यास करताना केवळ तर्कशुद्ध आणि पुराव्यासह सिद्ध गोष्टी मान्य केल्या पाहिजेत. आपण आत्मविश्वासाने संस्कृत भाषेचा अभ्यास केला पाहिजे. कोणतेही शिक्षण घ्या, पण संस्कृतचा अभ्यास करणे सोडू नका,’’ असा सल्ला संस्कृततज्ज्ञ डॉ. नी. एम. नीलकंठन यांनी दिला.
टिळक महाराष्ट्र विद्यापीठाच्या श्री बालमुकुंद लोहिया संस्कृत आणि भारतीय विद्या अध्ययन केंद्रातर्फे ५६वा संस्कृत दिन साजरा करण्यात आला. या वेळी डॉ. नीलकंठन यांना ‘लोकमान्य टिळक संस्कृत पुरस्कार’ देऊन सन्मानित करण्यात आले. विद्यापीठाच्या कुलगुरू डॉ. गीताली टिळक, प्रभारी कुलसचिव डॉ. सुवर्णा साठे, अधिष्ठाता प्रा. मंजूषा गोखले, डॉ. मंजिरी भालेराव आदी उपस्थित होते.
डॉ. टिळक म्हणाल्या, ‘‘विद्यार्थ्यांनी संस्कृत विषयाचा केवळ गुण मिळविण्याकरिता अभ्यास करू नये. संस्कृत भाषेत अनेक संधी उपलब्ध आहेत. यात संशोधनासाठी मोठा वाव आहे. त्यामुळे संस्कृत भाषेचा प्रचार-प्रसार करण्यासाठी प्रत्येकाने पुढाकार घेतला पाहिजे.’’
संस्कृत दिनानिमित्त ‘मूर्ती’ विषयावर तीन मिनिटांची संस्कृत भाषेतील लघुपट स्पर्धा घेण्यात आली. यात अमृता करंबेळकर, शर्वरी एरंडे, प्राजक्ता साहनी यांनी अनुक्रमे पहिले तीन क्रमांक पटकाविले, तर वेदिका काण्णव यांनी उत्तेजनार्थ पारितोषिक पटकाविले. कार्यक्रमाचे प्रास्ताविक डॉ. भालेराव यांनी, तर प्रथमेश बिवलकर यांनी सूत्रसंचालन केले. डॉ. गोखले यांनी आभार मानले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.