पुणे, ता. १९ ः मदत करण्याच्या बहाण्याने रेल्वे प्रवासी महिलेला बॅगेतील सोन्याच्या बांगड्या आणि अंगठी लांबविणाऱ्या चोरट्याला लोहमार्ग पोलिसांच्या पथकाने दिल्लीतून अटक केली. चोरट्याने पुणे आणि मिरज रेल्वे स्थानकात प्रवाशांकडील ऐवज चोरल्याचे दोन गुन्हे केल्याचे उघडकीस आले आहेत. त्याच्याकडून ११० ग्रॅम सोन्याचे दागिने जप्त करण्यात आले आहेत.
रमेश ऊर्फ मोटा पिता फुलचंद (रा. न्यू अनाज मंडी, नजफगड, दिल्ली) असे अटक करण्यात आलेल्या चोरट्याचे नाव आहे. याबाबत एका महिलेने पुणे लोहमार्ग पोलिस ठाण्यात फिर्याद दिली होती. तक्रारदार महिला २५ मेला बडोदा-पुणे या मार्गावरील रेल्वेने प्रवास करत होत्या. पुणे रेल्वे स्थानकाजवळ गाडी आल्याने महिलेने खडकी परिसरात तिच्याकडील बॅग दरवाजात आणून ठेवण्याचा प्रयत्न केला. त्या वेळी चोरटा रमेश डब्यात होता. त्याने प्रवासी महिलेला दरवाजापर्यंत बॅग ठेवतो, असे सांगितले. महिलेला मदत करण्याचा बहाणा करून त्याने बॅगेतून ५२ ग्रॅम वजनाच्या सोन्याच्या बांगड्या, तसेच एक ग्रॅम वजनाची लहान मुलांची अंगठी असा ऐवज लांबविला.
याबाबत तक्रार दाखल झाल्यानंतर पुणे लोहमार्ग पोलिस दलाच्या अधीक्षक अश्विनी सानप यांनी या प्रकरणाचा तपास करण्याचा आदेश स्थानिक गुन्हे अन्वेषण शाखेला दिला होता. पोलिसांच्या पथकाने तपास सुरू केला. तेव्हा रमेश आणि त्याच्याबरोबर असलेल्या चार साथीदारांनी बॅगेतून ऐवज चोरल्याचे उघडकीस आले. आरोपी रमेश दिल्लीत राहत असल्याची माहिती तांत्रिक तपासात मिळाली. त्यानंतर लोहमार्ग पोलिसांचे पथक दिल्लीला रवाना झाले. दिल्ली पोलिसांच्या मदतीने आरोपी रमेशला ताब्यात घेतले. पोलिस निरीक्षक इरफान शेख, सहायक निरीक्षक प्रभाकर कापुरे, उपनिरीक्षक सुनील माने, दीपक धिवार, सुरेश रासकर, हवालदार दीपक ठोंबरे, संदीप काटे, प्रशांत डोईफोडे, उदय चिले, अमित गवारी, मिथुन जानकर, रितेश राठोड यांनी ही कामगिरी केली.