पुणे, ता. २१ ः राज्यात लम्पी त्वचा रोगाचा प्रादुर्भाव २५ जिल्ह्यांत झाला आहे. पुणे, सातारा, सोलापूर, अहिल्यानगर, बुलडाणा व जळगाव हे जिल्हे सर्वाधिक बाधित आहेत. अकरा हजार जनावरे बाधित झाली असून, त्यापैकी आठ हजार ३३० जनावरे उपचारानंतर बरी झाली आहेत. आतापर्यंत ४०३ जनावरांचा मृत्यू झाला आहे.
लम्पी हा त्वचारोग गोवंशीय वर्गात होणारा विषाणूजन्य रोग आहे. राज्यात लम्पी त्वचारोगाच्या पार्श्वभूमीवर बाधित जिल्ह्यांमध्ये १५३ फिरती पशुचिकित्सा पथके वैद्यकीय सेवा देत असून, पशुपालकांमध्ये रोगाविषयी जनजागृती करण्यात येत आहे. राज्यातील एकूण गोवंशीय पशुधनाच्या तुलनेत लम्पी त्वचारोगाचा प्रादुर्भाव अत्यल्प असून, पशुपालकांनी घाबरून न जाता जनावरांचे लसीकरण करून घ्यावे आणि पशुवैद्यकीय अधिकाऱ्यांच्या सूचनांचे पालन करावे, असे आवाहन पशुसंवर्धन आयुक्त डॉ. प्रवीणकुमार देवरे यांनी केले आहे.
डॉ. देवरे म्हणाले, ‘‘राज्यातील एक कोटी ३९ लाख गोवंशीय पशुधनाच्या तुलनेत लम्पी त्वचारोगाने ११ हजार ८४३ पशुधन बाधित असून ही टक्केवारी केवळ ०. ०८ टक्के इतकी अत्यल्प आहे. यापैकी ८ हजार ३३० जनावरे उपचारानंतर बरी झाली आहेत. पशुसंवर्धन विभागामार्फत तत्काळ व प्रभावी नियंत्रण उपाययोजना राबविल्या जात आहेत. राज्यात ९३ टक्क्यांपेक्षा जास्त गोवंशीय पशुधनाचे लसीकरण पूर्ण झाले आहे.’’