पुणे, ता. २१ ः राज्य सरकारच्या मराठीविरोधी धोरणांना विरोध करण्यासाठी रविवारी (ता. २४) मराठी आणि महाराष्ट्राची निर्धार परिषद आयोजित करण्यात आली आहे. ‘मराठी अभ्यास केंद्र’ आणि ‘मराठी देशाभिमानी संस्थे’तर्फे आयोजित ही परिषद सिंहगड रस्त्यावर असलेल्या साने गुरुजी स्मारकातील निळू फुले सभागृहात होणार आहे.
परिषदेतील पहिल्या सत्रात ‘महाराष्ट्रा वळुनी बघ जरा’ या पुस्तकाचे सकाळी ११ वाजता प्रकाशन करण्यात येणार आहे. अभिनेत्या चिन्मयी सुमीत आणि मराठी अभ्यास केंद्राचे अध्यक्ष डॉ. दीपक पवार यावेळी उपस्थित राहणार आहे. तर वैचारिक चर्चासत्रात भाषा व शिक्षणतज्ज्ञ डॉ. प्रकाश परब, भाषा सल्लागार समितीचे डॉ. लक्ष्मीकांत देशमुख, अर्थतज्ज्ञ डॉ. नीरज हातेकर, मुख्याध्यापक संघाचे महेंद्र गणुपले आणि भाषा धोरण अभ्यासक किशोर दरक सहभागी होणार आहेत, अशी माहिती संयोजक समितीचे अजित अभ्यंकर, रवींद्र माळवदकर आणि संदीप बर्वे यांनी दिली. परिषदेमध्ये मराठी भाषा, संस्कृती, शिक्षण, साहित्य, नाटक, चित्रपट तसेच सामाजिक-राजकीय प्रश्नांवर चर्चासत्रे, व्याख्याने आणि सांस्कृतिक कार्यक्रम होणार आहेत. रवींद्र धनक, इब्राहिम खान, शंतनू पांडे आणि ॲड. नीरज धुमाळ यावेळी उपस्थित होते.