पुणे, ता. १९ : शहरात रस्ते खोदाई करताना नियम मोडणाऱ्या ठेकेदाराचे काम महापालिकेने स्थगित केले आहे. खोदकाम केलेले रस्ते आधी दुरुस्त करा, फोटोसह त्याचा अहवाल सादर करा, मगच पुढची परवानगी दिली जाईल, अशी नोटीस पथ विभागाने ठेकेदाराला बजावली आहे. शहरात होणाऱ्या मनमानी खोदाईच्या विरोधात ‘सकाळ’ने वृत्त प्रसिद्ध करून हा प्रकार चव्हाट्यावर आणला होता.
शहरात सीसीटीव्हीचे जाळे निर्माण करण्यासाठी गृह विभागाने निविदा मंजूर केली आहे. त्यासाठी ठेकेदाराकडून केबल टाकण्यासाठी रस्ते खोदाई केली जात आहे. त्याचप्रमाणे महापालिकेच्या आपत्ती व्यवस्थापन नियंत्रण कक्षासाठीही भूमिगत केबल टाकण्याचे काम स्वतंत्रपणे सुरू आहे. या दोन्ही ठेकेदारांनी शहरात अनेक किलोमीटरची खोदाई सुरू केली आहे. सीसीटीव्हीसाठी रस्ते खोदाई केल्यानंतर दुरुस्तीचे काम महापालिकेचे आहे. तर आपत्ती व्यवस्थापन केंद्रासाठी केल्या जाणाऱ्या खोदाईनंतर रस्ते दुरुस्तीचे काम हे संबंधित ठेकेदाराने करणे आवश्‍यक आहे. हे काम दिनेश इंजिनिअरिंग या कंपनीकडून सुरू आहे.
ठेकेदारांना दिलेल्या नियमानुसार ५०० मीटरपर्यंत खोदाई झाल्यानंतर तेथील रस्ते दुरुस्त करायचे. त्यानंतर पुढील खोदकाम करणे आवश्‍यक होते. पण त्याकडे दुर्लक्ष करत रस्ते दुरुस्ती न करता सरसकट शहरात खोदाई सुरू केली. ‘सकाळ’ने शहरातील हे विदारक वास्तव मांडल्यानंतर महापालिका प्रशासनाने आज दिनेश इंजिनिअरिंग या ठेकेदाराला नोटीस बजावून काम थांबविण्याचे आदेश दिले आहेत. आत्तापर्यंत जेवढे खोदकाम झाले, त्याची आधी दुरुस्ती करावी. त्याचा फोटोसह अहवाल सादर करावा. त्यानंतरच पुढील खोदाईची परवानगी दिली जाईल, असे बजाविण्यात आले असल्याचे पथ विभाग प्रमुख अनिरुद्ध पावसकर यांनी सांगितले.

सीसीटीव्हीची खोदाईही थांबली
महापालिकेने सीसीटीव्हीसाठी केबल टाकणाऱ्या ठेकेदाराचीही खोदाई थांबविली आहे. या ठेकेदाराने खोदलेले पादचारी मार्ग, रस्ते दुरुस्त करण्याची जबाबदारी महापालिकेची आहे. त्यामुळे पुढील आठवड्यात महापालिकेतर्फे हे काम पूर्ण झाल्यानंतरच सीसीटीव्हीसाठी खोदाई करण्यास परवानगी दिली जाणार असल्याचे पावसकर यांनी सांगितले.