पुणे, ता. २० : मुंढवा येथील शासकीय जमीन गैरव्यवहार प्रकरणात शीतल तेजवानीची आज सहा तास कसून चौकशी करण्यात आली. सोमवारी तिचा जबाब नोंदविण्यात आला होता. तेजवानीने महार वतन मिळालेल्या व्यक्तींकडून पॉवर ऑफ अॅटर्नी करून घेतलेले कागदपत्रे तसेच ‘अमेडिया एंटरप्राइझेस’ कंपनीसोबत केलेल्या व्यवहाराच्या अनुषंगाने ही चौकशी झाल्याची माहिती वरिष्ठ अधिकाऱ्यांनी दिली. पोलिसांनी चौकशीच्या अनुषंगाने काही कागदपत्रे जप्त केली आहेत.
उपमुख्यमंत्री अजित पवार यांचे सुपुत्र पार्थ पवार संचालक असलेल्या ‘अमेडिया कंपनीवर’ मुंढवा येथील जमीन प्रकरणात खडक पोलिस ठाण्यात एक गुन्हा नोंद झाला. या गुन्ह्याचा तपास आर्थिक गुन्हे शाखा करत आहे. मुंढवा येथील जमीन महार वतनाची आहे. परंतु, २००६ मध्ये तेजवानी हिने २७५ व्यक्तींकडून ही जमीन पॉवर ऑफ अॅटर्नी करून घेतली. त्यानंतर २०२५ मध्ये ही जमीन तेजवानीने अमेडिया कंपनीसोबत करार करून त्यांना दिली.
दरम्यान, पुणे पोलिस आता जमीन प्रकरणात नेमका व्यवहार काय झाला, या अनुषंगाने तपास करत आहे. तहसीलदार सूर्यकांत येवले, ‘अमेडिया एंटरप्राइझेस’ कंपनीचे भागीदार दिग्विजय पाटील, शीतल तेजवानी आणि हेमंत गवंडे यांना नोटीस देऊन चौकशीला बोलावले होते. त्यातील हेमंत गवंडे याची चौकशी करण्यात आली आहे. आता बुधवारपासून तेजवाणीची चौकशी सुरू आहे.

आजही होणार चौकशी
तेजवानी हिच्याकडे करण्यात आलेल्या चौकशीत अनेक मुद्दे समोर आले आहेत. त्या अनुषंगाने काही कागदपत्रे देखील जप्त करण्यात आली आहेत. शुक्रवारी (ता. २१) देखील या प्रकरणात चौकशीसाठी तेजवानीला बोलविण्यात आले आहे, अशी माहिती वरिष्ठ पोलिस अधिकाऱ्यांनी दिली.

याबाबत केली चौकशी
- पॉवर ऑफ अॅटर्नी करून घेताना त्यांना काय मोबदला दिला का?
- कशाच्या आधारावर पॉवर ऑफ अॅटर्नी करण्यात आली?
- अमेडिया कंपनीसोबत झालेला व्यवहार कशा पद्धतीने झाला?