पुणे, ता. २५ : बिहार येथील बोधगया महाबोधीविहार बौद्ध धर्मीयांच्या व्यवस्थापनाखाली असावे, अशी मागणी जगभरातील बौद्ध समाजबांधवांकडून करण्यात येत आहे. या मागणीच्या अनुषंगाने एक एप्रिलला दिल्लीतील कॉन्स्टिट्यूशन क्लबमध्ये राष्ट्रीय परिषदेचे आयोजन करण्यात आले आहे. त्याद्वारे पंतप्रधानांची भेट घेतली जाणार असल्याची माहिती ‘नॅशनल कॉन्फरन्स फॉर मायनॉरिटी’तर्फे आयोजित पत्रकार परिषदेत राहुल डंबाळे आणि डॉ. सिद्धार्थ धेंडे यांनी दिली.
या वेळी माजी नगरसेवक राहुल तुपेरे, अनिता धिमधिमे, सोनिया ओव्हाळ, राहुल नागटिळक, किरण सोनावणे उपस्थित होते. डंबाळे म्हणाले, ‘‘देशभरातील आंदोलकांना एकत्र आणून व्यापक विचारविनिमय करून पुढील दिशा ठरविण्यासाठी या परिषदेचे आयोजन करण्यात आले आहे. परिषदेत देशभरातील बौद्ध संघटनांच्या प्रतिनिधींसह खासदार वर्षा गायकवाड, बळवंत वानखेडे, चंद्रकांत हंडोरे, तमिळनाडूचे खासदार थोल थिरूवलन, डी. राजकुमार, तसेच दिल्लीचे माजी मंत्री राजेंद्र पाल गौतम आदी मान्यवर सहभागी होणार आहेत. या परिषदेतून बौद्ध समाजाच्या मागण्यांसाठी ठोस भूमिका घेतली जाणार आहे.