पुणे, ता. २५ : शिवाजीनगर विधानसभा मतदारसंघात रस्ते, पाणी, पथदिवे, कचरा, स्वच्छतागृहांसंबंधी समस्या आहेत, मात्र महापालिका प्रशासनाकडून संबंधित प्रश्‍न सोडविण्याकडे दुर्लक्ष केले जात आहे. संबंधित प्रश्‍न तातडीने सोडविण्यात यावेत, अशी मागणी राष्ट्रवादी कॉंग्रेस शरदचंद्र पवार पक्षातर्फे पालिकेकडे करण्यात आली आहे.
शिवाजीनगर, खडकी, बोपोडी, खडकी रेल्वे स्थानकाजवळील बोगदा, नदीपात्र अशा ठिकाणी मोठ्या प्रमाणात कचरा टाकला जात आहे. शाळांजवळील रस्त्यांवर शास्त्रीय पद्धतीचे गतिरोधक, झेब्रा पट्टे नसल्याने अपघाताच्या घटना घडूनही दुर्लक्ष केले जात आहे. अधिकाऱ्यांकडे तक्रारी करूनही दुर्लक्ष केले जात आहे. संबंधित प्रश्‍न सोडविण्याबरोबरच संबंधित अधिकाऱ्यांवर तातडीने कारवाई करावी, अन्यथा तीव्र आंदोलन करण्यात येईल, असा इशारा शिवाजीनगर विधानसभा मतदारसंघाचे कार्याध्यक्ष बाळासाहेब आहेर, अध्यक्ष डॉ. अभिषेक बोके, महिला विभागाच्या अध्यक्ष नूतन गायकवाड यांनी दिला आहे.