पुणे, ता. २७ : तात्पुरते अथवा कायमस्वरूपी क्रशर आणि खाणपट्टाधारकांनी सर्वप्रकारच्या परवानग्या घेऊनच उत्खनन करावे. त्यासाठी लागणाऱ्या सर्व संबंधित विभागांकडून ना - हरकत प्रमाणपत्र घेऊन परवानगीकरिता जिल्हाधिकारी कार्यालयाकडे प्रस्ताव सादर करावा, असे आवाहन जिल्हाधिकारी जितेंद्र डुडी यांनी केले आहे.

क्रशर व खाणपट्टाधारकांच्या अडचणींबाबत आयोजित बैठकीत ते बोलत होते. या वेळी अपर जिल्हाधिकारी सुहास मापारी, जिल्हा खनिकर्म अधिकारी सुयोग जगताप, जिल्हा क्रशर खाणपट्टाधारक संघटनेचे अध्यक्ष प्रदीप कंद यांच्यासह जिल्ह्यातील क्रशर खाणपट्टाधारक उपस्थित होते.

क्रशर आणि खाणपट्टाधारकांच्या समस्या जाणून घेऊन डुडी म्हणाले, ‘‘क्रशर आणि खाणपट्टा परवानगीकरिता लागणाऱ्या पर्यावरण ना-हरकत प्रमाणपत्राकरिता क्रशर आणि खाणपट्टाधारकांना परवानगी देण्याबाबत पर्यावरण विभागाच्या सचिवांना विनंती करण्यात येईल. क्रशर खाणपट्टाधारकांनी आपल्या वाहनांवर ‘जीपीएस’ लावून इलेक्ट्रॉनिक ट्रान्झिट पासेस (ईटीपी) ठेवावे. आपापल्या खाणपट्ट्याची भूमी अभिलेख विभागाद्वारे मोजणी करून घ्यावी. खाणपट्ट्यात केलेले उत्खनन आणि त्याकरिता भरलेल्या शुल्काचा ताळमेळ संबंधित तहसीलदारांकडून तपासून करून घ्यावा, तसेच जिल्ह्यात पारदर्शक पद्धतीने कामकाज करण्यावर प्रशासनाचा भर आहे. त्यामुळे नियमांचे सर्वांनी पालन करावे. आपल्या परिसरात बेकायदा कामकाज होत असल्यास प्रशासनास कळवावे.’’

कंद यांनी क्रशर, खाणपट्टाधारकांच्या अडचणींबाबत सूचना केल्या. नियमांचे पालन करून प्रशासनास सहकार्य करण्यात येईल, असे ते म्हणाले.