पुणे, ता. १८ ः पार्टी करून घरी जात असताना दुचाकी घसरून पडल्याने युवकाचा मृत्यू झाला. याप्रकरणी त्याच्या मित्रावर गुन्हा दाखल करण्यात आला आहे. दोघे मित्र एकाच दुचाकीवर जात असताना हा अपघात झाला. मृत्युमुखी पडलेल्या तरुणाचे नाव दीपू परभेश राजभर (वय २१) असे आहे. दीपू याचा मित्र शोएब नयूम शेख (वय २५, दोघेही रा. वाघजाईनगर, आंबेगाव खुर्द) हा या अपघातात जखमी झाला आहे. अपघातास जबाबदार ठरल्याप्रकरणी शेख याच्याविरुद्ध गुन्हा दाखल करण्यात आला. याबाबत पोलिस हवालदार अनिल भोसले यांनी आंबेगाव पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, ११ जानेवारीला ते खेड शिवापूर येथे पार्टीसाठी गेले होते. पार्टी करून परतत असताना मुंबई-बंगळूर बाह्यवळण मार्गावर नवीन बोगदा पार केल्यानंतर काही अंतरावर गतिरोधक आला. त्यावेळी दुचाकीस्वार शोएबने वेग कमी करण्यासाठी ब्रेक दाबला, तेव्हा दुचाकी घसरली आणि दीपू दुचाकीवरून पडल्याने त्याच्या डोक्याला गंभीर दुखापत झाली. उपचारादरम्यान त्याचा मृत्यू झाला.

भरधाव मोटारीच्या धडकेत तरुणाचा मृत्यू ः
पुणे रेल्वे स्थानक परिसरातील राजा बहाद्दूर मिल रस्त्यावर भरधाव मोटारीच्या धडकेत तरुणाचा मृत्यू झाल्याची घटना घडली. याप्रकरणी चालकाविरुद्ध बंडगार्डन पोलिसांनी गुन्हा दाखल केला आहे. अथर्व संभाजी पास्तापुरे (वय २१) असे मृत्युमुखी पडलेल्या दुचाकीस्वार तरुणाचे नाव आहे. याबाबत नरसिंह संजय भांडारे (वय २४, रा. आनंदवाडी, ता. चाकूर, जि. लातूर) याने बंडगार्डन पोलिस ठाण्यात फिर्याद दिली आहे. पोलिसांनी दिलेल्या माहितीनुसार, भांडारे यांचा मामेभाऊ दुचाकीस्वार अथर्व गुरुवारी (ता.१६) दुपारी पावणेबाराच्या सुमारास राजा बहाद्दूर मिल रस्त्याने निघाला होता. त्यावेळी भरधाव मोटारीने दुचाकीस्वार अथर्वला धडक दिली. अपघातात गंभीर जखमी झालेल्या अथर्वचा मृत्यू झाला. अपघातानंतर घटनास्थळी न थांबता मोटारचालक पसार झाला.