पुणे, ता. १३ : वडगाव शेरी येथील क्राइस्ट कॉलेज व्यवस्थापन विभागाने एम्पॉवर चॅरिटेबल ट्रस्टच्या सहकार्याने ‘पल्स-२५ राष्ट्र निर्माण यूथ शाश्वत विकास ध्येय फोरम’ आणि ‘कल्चरल कॉन्फ्लुएन्स’चे आयोजन केले होते. या कार्यक्रमाचे उद्‌घाटन सावित्रीबाई फुले पुणे विद्यापीठाच्या प्र-कुलगुरू डॉ. पराग काळकर व प्रा. डॉ. विलास आढाव यांच्या हस्ते झाले.
या वेळी कुणाल जगताप, डॉ. अंकित खन्ना, डॉ. रुचिरा खन्ना उपस्थित होते. त्यांचे स्वागत फादर डॉ. अरुण चुल्ली व दीपा सुजित यांनी केले. कार्यक्रमात एम्पॉवर चॅरिटेबल ट्रस्टचे संस्थापक संचालक विनय दवे यांनी सादर केलेला संविधान प्रेरित व एसडीजी केंद्रित माहितीपट प्रदर्शित करण्यात आला. त्यानंतर प्रश्नमंजूषा स्पर्धा व सांस्कृतिक कार्यक्रम, पथनाट्य, वादविवाद, पोस्टर्स, रील्स, संगीत व नृत्य यांचा समावेश होता. या उपक्रमातून टिकाऊ विकास, सांविधानिक कर्तव्ये व राष्ट्रनिर्मितीविषयक जाणीव निर्माण करण्यात आली. ३० हून अधिक महाविद्यालयांतील ४०० पेक्षा अधिक विद्यार्थ्यांनी यात सहभाग घेतला. स्पर्धांचे परीक्षण ॲड. त्रिरत्न बागूल, ॲड. प्रतिभा शाक्य, निखिल गडकर, प्रा. स्वाती कांबळे व प्रकाश पारखे यांनी केले.