पुणे, ता. २३ : वैष्णवी हगवणे मृत्यूप्रकरणी अटकेत असलेल्या हगवणे कुटुंबीयांतील सर्व दोषींवर ‘मकोका’अंतर्गत कारवाई करण्याची मागणी राष्ट्रवादी काँग्रेस शरदचंद्र पवार पक्षाचे प्रदेश सरचिटणीस सुनील माने यांनी सरकारकडे केली होती. त्याबाबत मुख्यमंत्री देवेंद्र फडणवीस यांनी सकारात्मक भूमिका घेत आवश्यकता वाटली, तर आरोपींना ‘मकोका’ लावण्याची घोषणा केली. याबाबत माने यांनी गुरुवारी (ता. २२) उपमुख्यमंत्री अजित पवार यांच्याकडे आपल्या मागणीचे पत्र दिले होते. हगवणे कुटुंबाने वैष्णवीला मारहाण करून तिला आत्महत्येस प्रवृत्त केले. त्याचप्रमाणे त्यांची मोठी सून मयूरी जगताप हिचाही ते छळ करत होते. यावरून हे आरोपी तोच तो गुन्हा सतत करणारे असल्याने या प्रकरणात तातडीने ‘मकोका’नुसार गुन्हा दाखल करावा, असे पत्रात नमूद केले होते.