पुणे, ता. २४ : नवोदित कलाकारांना व्यासपीठ उपलब्ध करून देण्याच्या उद्देशाने तारंगिणी सांस्कृतिक प्रतिष्ठानतर्फे दर महिन्याला आयोजित केली जाणारी ‘मासिक मैफील सोमवारी (ता. २६) होणार आहे.
गेल्या महिन्यातील मैफिलीला रसिकांचा उत्स्फूर्त प्रतिसाद मिळाला असून, या महिन्याची मैफील सायंकाळी ६.३० वाजता एरंडवण्यातील अश्वमेध हॉल येथे होईल. या मासिक मैफिलीतील पहिल्या सत्रात युवा गायक आशिष रानडे आपली गायनकला सादर करणार असून, त्यांना उदय कुलकर्णी (हार्मोनिअम) आणि ऋषिकेश जगताप (तबला) अशी साथ देणार आहेत. या कार्यक्रमातील दुसऱ्या सत्रात युवा सतारवादक आदित्य देशपांडे यांचे सतारवादन रसिकांना अनुभवता येणार आहे.
या उपक्रमाला व्हीजे परिवार आणि ईलाइट एव्हेंट्सचे सहकार्य लाभले आहे. ‘सकाळ माध्यम समूह’ या कार्यक्रमाचे माध्यम प्रायोजक आहे. युवा कलाकारांना प्रोत्साहन देण्यासाठी घेतलेल्या या उपक्रमाचे रसिकांमध्ये कौतुक होत आहे. पुण्यातील संगीतप्रेमींनी या मैफिलीला उपस्थित राहून नव्या पिढीतील कलाकारांचे सादरीकरण अनुभवावे, असे आवाहन संयोजक अभेद अभिषेकी यांनी केले आहे.