पुणे, ता. २७ ः कौटुंबिक वाद तसेच पाहुण्यांसोबत गप्पा मारत जेवत असताना मोठ्या आवाजात बोलू नका, असे म्हणत लहान भावाने मोठ्या भावावर तीक्ष्ण हत्याराने वार करून जिवे मारण्याचा प्रयत्न केला. बोपोडीतील कमलाबाई बहिरट चाळीत शुक्रवारी (ता. २३) ही घटना घडली.
याप्रकरणी खडकी पोलिस ठाण्यात वफाद शेख (वय ४५) याच्यावर गुन्हा दाखल करण्यात आला आहे. याबाबत ४५ वर्षीय व्यक्तीने तक्रार दिली आहे. पोलिसांच्या माहितीनुसार, आरोपी हा तक्रारदार यांचा दीर आहे. ते शेजारी-शेजारी राहण्यास आहेत. तीन दिवसांपूर्वी त्या व त्यांचे पती आणि काही नातेवाईक घरी गप्पा मारत जेवण करत होते. तेव्हा आरोपी त्यांच्या दरवाजात आला. त्याने आवाज करू नका, असे बोलून त्यांना शिवीगाळ करण्यास सुरुवात केली. त्यावरून वादावादी झाली. त्या रागात आरोपीने तक्रारदार यांच्या पतीवर हत्याराने मानेवर व गालावर वार करून त्यांना जिवे ठार मारण्याचा प्रयत्न केला. यामध्ये तक्रारदाराचे पती हे गंभीररीत्या जखमी झाले. त्यांनी रुग्णालयात उपचार घेतले. त्यानंतर तक्रार दिली आहे.