पुणे, ता. २७ : अतिवृष्टीमुळे बाधित झालेल्या भागाचे पंचनामे तत्काळ सुरु करावेत, असे आदेश जिल्हाधिकारी जितेंद्र डुडी यांनी महसूल, कृषी, जिल्हा परिषद, सार्वजनिक बांधकाम, महावितरण आणि पशुसंवर्धन विभागांना दिले आहेत.
पालकमंत्री अजित पवार यांनी बारामती व इंदापूर तालुक्यात अतिवृष्टीमुळे नुकसानग्रस्त झालेल्या भागाची पाहणी करून तत्काळ पंचनामे करण्याच्या सूचना दिल्या होत्या. त्या अनुषंगाने जिल्हाधिकाऱ्यांनी विविध विभागांना आदेश दिले आहेत.
जिल्ह्यात सुरु असलेल्या पर्जन्यमानाबाबत उपविभागीय अधिकारी, तहसीलदार व सर्व संबंधित यंत्रणांनी सतर्क राहून वेळोवेळी परिस्थितीचा आढावा घ्यावा व घडलेल्या घटनांबाबत तत्काळ प्रतिसाद देण्याच्या सूचनाही जिल्हाधिकाऱ्यांनी दिल्या आहेत. यासाठी जिल्हास्तरावर आपत्ती नियंत्रण कक्ष २४ तास सुरु आहे. त्याचा हेल्पलाइन क्रमांक ०२०-२६१२३३७१, २६१३३५२२ व टोल फ्री क्रमांक १०७७ हा असून या नियंत्रण कक्षाशी तालुका व गावपातळीवरील नागरिकांनी तत्काळ संपर्क करण्याचे आवाहन डुडी यांनी केले आहे.