पुणे, ता. १९ ः स्वारगेट येथील केशवराव जेधे चौकातील भुयारी मार्ग दुरुस्तीसाठी बंद ठेवण्यात येणार असल्याचे पुणे महापालिकेने जाहीर केले होते, मात्र पावसामध्ये दुरुस्तीच्या कामास अडचण येत असल्याने भुयारी मार्ग वाहतुकीसाठी सुरू ठेवण्यात येणार आहे, त्याबाबतची माहिती वाहतूक पोलिसांनी दिली आहे.
महापालिका प्रशासनाकडून जेधे चौकातील भुयारी मार्गामध्ये दुरुस्तीचे काम शुक्रवारी (ता. १९) रात्रीपासून सुरू करण्यात येणार होते. हे काम सोमवारी (ता. २२) सकाळी सात वाजेपर्यंत पूर्ण होणार होते. या कालावधीमध्ये भुयारी मार्ग वाहतुकीसाठी बंद ठेवण्यात येणार असल्याची माहिती महापालिकेच्या विशेष प्रकल्प विभागाकडून बुधवारी देण्यात आली होती. तर, दुसऱ्या दिवशी वाहतूक पोलिसांनीही याबाबतचे पत्र काढले होते. दरम्यान, गुरुवारी सायंकाळी शहरात मोठ्या प्रमाणात पाऊस झाला. त्याचा फटका भुयारी मार्गासही बसला. तसेच पाऊस सुरू असल्याने तेथे काम करणे अशक्‍य असल्याचे ठेकेदाराकडून महापालिकेस सांगण्यात आले. त्यानंतर महापालिकेने यासंदर्भात पोलिसांच्या वाहतूक शाखेला माहिती दिली. त्यानुसार, वाहतूक शाखेने शुक्रवारी प्रसिद्धिपत्रक जारी करत, भुयारी मार्ग वाहतुकीसाठी बंद ठेवण्यात येणार नाही, भुयारी मार्ग नेहमीप्रमाणे सुरळीत सुरू राहील, असे पत्रकामध्ये नमूद केले आहे.

स्वारगेटच्या जेधे चौकातील भुयारी मार्ग दुरुस्तीचे काम पावसामुळे पुढे ढकलण्यात आले आहे. त्यासंदर्भात वाहतूक पोलिसांशी संपर्क साधला आहे. भुयारी मार्ग वाहतुकीसाठी खुला राहणार आहे.
- दिनकर गोजारे, प्रमुख, विशेष प्रकल्प विभाग, पुणे महापालिका