पुणे, ता. २९ ः खराडी भागातील एका इमारतीत मसाज पार्लरच्या नावाखाली सुरू असलेल्या वेश्याव्यवसायावर पोलिसांनी छापा टाकला. या कारवाईत पोलिसांनी एका महिलेसह चौघांवर गुन्हा दाखल केला आहे. मसाज पार्लरमधून तरुणींची सुटका करण्यात आली आहे.
संदीप चव्हाण, रोहित शिंदे, गोपाळ, तसेच स्वाती ऊर्फ श्वेता विजय शिंदे अशी गुन्हा दाखल करण्यात आलेल्यांची नावे आहेत. याबाबत पोलिस शिपाई वर्षा सावंत यांनी चंदननगर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, चंदननगर-खराडी भागातील एका फिटनेस क्लबजवळ असलेल्या इमारतीत आरोपी मसाज पार्लर चालवीत होते. त्यात वेश्याव्यवयास सुरू असल्याची माहिती पोलिसांना मिळाली. त्यानंतर पोलिसांनी बनावट ग्राहकाच्या माध्यमातून खातरजमा केली. पोलिसांनी मसाज पार्लरवर छापा टाकून कारवाई केली. चौकशीत मसाज पार्लरमधील तरुणींना आरोपींनी जादा पैशांचे आमिष दाखवून त्यांना वेश्याव्यवसायास प्रवृत्त केल्याची माहिती मिळाली. वरिष्ठ पोलिस निरीक्षक सीमा ढाकणे तपास करत आहेत. पोलिसांनी गेल्या काही दिवसांत मार्केट यार्ड आणि धनकवडी भागातील मसाज पार्लरवर कारवाई करून गुन्हे दाखल केले आहेत.