पुणे, ता. २९ : राज्य सरकारमार्फत ‘राष्ट्रनेता ते राष्ट्रपिता सेवा पंधरवडा’ या कालावधीत मागासवर्गीय विद्यार्थ्यांसाठी जात प्रमाणपत्र पडताळणी विशेष मोहीम राबविण्यात येणार आहे.
चालू शैक्षणिक वर्षात (२०२५-२६) बारावी विज्ञान शाखेत शिक्षण घेणाऱ्या तसेच बारावी उत्तीर्ण होऊन वैद्यकीय, अभियांत्रिकी, फार्मसी, कृषी, आदी व्यावसायिक अभ्यासक्रमास प्रवेश घेतलेल्या अनुसूचित जाती, विमुक्त जाती, भटक्या जमाती, इतर मागास वर्ग, विशेष मागास प्रवर्ग व शैक्षणिक व सामाजिकदृष्ट्या मागास प्रवर्ग (मराठा ) या मागास प्रवर्गातील विद्यार्थ्यांसाठी जात वैधता प्रमाणपत्र सादर करणे बंधनकारक आहे. अशा विद्यार्थ्यांसाठी ही विशेष मोहीम राबविण्यात येणार आहे. विद्यार्थ्यांनी आपले अर्ज ‘सीओव्हीआयएस’ प्रणाली किंवा www.barti.maharashtra.gov.in या संकेतस्थळावर ऑनलाइन भरून त्याची प्रत जिल्हा जात प्रमाणपत्र पडताळणी समितीच्या आळंदी रस्त्यावरील डॉ. बाबासाहेब आंबेडकर सामाजिक न्याय भवन येथे वेळेत सादर करावी. अर्ज दाखल करण्याची अंतिम मुदत ३१ डिसेंबर २०२५ आहे. व्यावसायिक अभ्यासक्रमास प्रवेश घेतलेल्या व अर्ज प्रलंबित असलेल्या विद्यार्थ्यांसाठी दर बुधवारी व गुरुवारी विशेष शिबिराचे आयोजन करण्यात आले असून, परिपूर्ण प्रकरणात तत्काळ जात वैधता प्रमाणपत्र देण्यात येणार आहे, अशी माहिती जिल्हा जात प्रमाणपत्र पडताळणी समितीचे उपायुक्त संजय दाणे यांनी दिली.
-------------