पुणे, ता. १ : मध्यरात्री सदनिकेत घुसून सोन्याचे दागिने चोरणाऱ्या आणि विरोध करणाऱ्या फिर्यादीवर लोखंडी रॉडने हल्ला करणाऱ्या अल्पवयीन मुलास अलंकार पोलिसांनी ताब्यात घेतले. या कारवाईत ६० हजार रुपयांचा मुद्देमाल जप्त केला असून, त्याच्या साथीदारांचा शोध सुरू आहे.
पोलिसांनी दिलेल्या माहितीनुसार, २८ सप्टेंबरला पहाटे साडेतीनच्या सुमारास राहुलनगर सोसायटीतील एका सदनिकेत दोन चोरट्यांनी घरफोडी केली. या वेळी शेजारच्या सदनिकेतील नागरिकांनी आवाज ऐकून त्यांना रोखण्याचा प्रयत्न केला असता आरोपींनी लोखंडी रॉडने डोक्यावर वार करून गंभीर दुखापत केली. या घटनेत ७० हजार रुपये किमतीचे सोन्याचे दागिने चोरीला गेले. याप्रकरणी अलंकार पोलिस ठाण्यात गुन्हा दाखल केला आहे. या घटनेनंतर पोलिसांनी परिसरातील २० ते २५ सीसीटीव्हीतील चित्रीकरण तपासले. पोलिसांनी एका अल्पवयीन मुलाला ताब्यात घेत त्याच्याकडून सोन्याचे दागिने जप्त केले.