पुणे, ता. १ ः उपमुख्यमंत्री अजित पवार यांच्या जनता दरबारावेळी आलेल्या तक्रारींचा निपटारा करा, त्याबाबतचा अहवाल तातडीने सादर करा, अशा सूचना महापालिकेच्या अतिरिक्त आयुक्तांनी सर्व विभाग प्रमुखांना मंगळवारी दिल्या.
उपमुख्यमंत्री पवार यांनी १३ सप्टेंबर रोजी हडपसरमध्ये जनता दरबार घेतला होता. याबाबत रस्ते, अतिक्रमण, अनधिकृत बांधकाम, पाणी, सांडपाणी वाहिन्या, पथदिवे यासंदर्भातील विविध समस्या नागरिकांनी थेट पवार यांच्यासमोर मांडल्या होत्या. त्यावर कार्यवाही करण्याचे आदेश पवार यांनी महापालिका प्रशासनास दिला होते. या पार्श्‍वभूमीवर, संबंधित प्रश्‍नांसंदर्भात मंगळवारी महापालिकेत आढावा बैठक घेण्यात आली. यावेळी महापालिकेचे अतिरिक्त आयुक्त पृथ्वीराज बी. पी., एम. जे. प्रदीप चंद्रन, उपायुक्त अरविंद माळी यांच्यासह विविध विभागांचे प्रमुख यावेळी उपस्थित होते.
जनता दरबारामध्ये थेट व ऑनलाइन पद्धतीने ३५०० हून अधिक तक्रारी प्राप्त झाल्या होत्या. त्यानुसार, नागरिकांनी केलेल्या थेट तक्रारींची तातडीने दखल घ्यावी, तक्रारी तत्काळ सोडवून त्यासंबंधी शुक्रवारपर्यंत अहवाल सादर करावा. ऑनलाइन पद्धतीने आलेल्या तक्रारींचा निपटारा करून, त्यासंबंधी १५ दिवसांत अहवाल द्यावा. उपायुक्त माळी यांच्याकडे सर्व विभाग प्रमुखांनी आपापल्या खात्यांसंबंधी केलेल्या कामाची माहिती देण्याच्या सूचना पृथ्वीराज बी. पी. व प्रदीप चंद्रन यांनी केल्या.
-------------