पुणे, ता. ३ : महाराष्ट्र राज्य परीक्षा परिषदेतर्फे घेण्यात येणारी ‘महाराष्ट्र शिक्षक पात्रता परीक्षा-२०२५’ येत्या २३ नोव्हेंबरला होणार आहे. या परीक्षेकरिता अर्ज करण्यास परीक्षा परिषदेने मुदतवाढ दिली आहे. त्यामुळे आता परीक्षार्थींना येत्या गुरुवारपर्यंत (ता. ९) परीक्षेचा ऑनलाइन अर्ज भरता येणार आहे.
या परीक्षेचे ऑनलाइन अर्ज भरण्यासाठी यापूर्वी १५ सप्टेंबर ते ३ ऑक्टोबरपर्यंत मुदत देण्यात आली होती; परंतु राज्यात काही जिल्ह्यांमध्ये अतिवृष्टी आणि पूरस्थिती निर्माण झाल्याने परीक्षार्थींना ऑनलाइन अर्ज भरताना अडचणींना सामोरे जावे लागले. त्यामुळे राज्य परीक्षा परिषदेने ही मुदतवाढ दिली आहे, असे राज्य परीक्षा परिषदेच्या आयुक्त अनुराधा ओक यांनी स्पष्ट केले आहे.
परीक्षार्थींना तांत्रिक अडचणींमुळे परीक्षा शुल्क भरता न आल्याने संबंधित परीक्षार्थींना नेट बॅंकिंग, डेबिट कार्ड, क्रेडिट कार्ड याद्वारे शुल्क भरण्यासाठी येत्या गुरुवारी रात्री ११ वाजून ५९ मिनिटांपर्यंत मुदतवाढ दिली आहे. यानंतर कोणत्याही परिस्थितीत मुदतवाढ देण्यात येणार नाही, असे ओक यांनी परिपत्रकात नमूद केले आहे.