पुणे, ता. २८ : देशी गाईंची उत्पादन क्षमता कमी असल्यामुळे त्यांचे संगोपन करणे व्यावसायिकदृष्ट्या किफायतशीर ठरत नाही. अशा गाईंना गोशाळेत ठेवले जाते. या गोशाळा आर्थिकदृष्ट्या सक्षम करण्यासाठी तेथील गाईंना प्रतिदिन ५० रुपये अनुदान देण्यात येईल. त्यासाठी शासनाने गोवंश परिपोषण ही योजना राबवली आहे.
या अंतर्गत राज्यातील ५६० गोशाळांमधील ५६ हजार ५६९ गाईंसाठी २५ कोटी ४५ लाख ६६ हजार रुपये अनुदान वितरित करण्यात आले. मुख्यमंत्री देवेंद्र फडणवीस, पशुसंवर्धन मंत्री पंकजा मुंडे यांनी अभियानासाठी शुभेच्छा दिल्या, अशी माहिती गोसेवा आयोगाचे अध्यक्ष शेखर मुंदडा यांनी दिली.
आयोगाचे सदस्य डॉ. सुनील सूर्यवंशी, संजय भोसले, डॉ. नितीन मार्कंडेय, उद्धव नेरकर, संतकुमार गुप्ता, मनीष वर्मा, परेश शाह, दीपक भगत, सदस्य सचिव डॉ. मंजूषा पुंडलिक यांनी विशेष प्रयत्न केले.
मुंदडा म्हणाले, ‘‘या योजनेचे श्रेय फडणवीस, उपमुख्यमंत्री एकनाथ शिंदे, अजित पवार, पशुसंवर्धन मंत्री पंकजा मुंडे यांचे आहे. आयोगाकडे नोंदणीकृत असलेल्या गोशाळेतील गाईंसाठी अनुदान दिले जात आहे. देशी गोवंश संवर्धन काळाची गरज असून त्यामुळे ग्रामीण विकास गतिमान होण्यास चालना मिळेल.’’
-----