पुणे, ता. २९ ः वेश्या व्यवसाय सुरू असल्याची माहिती स्थानिकांनी ‘डायल ११२’ या क्रमांकावर दिल्यानंतर त्या ठिकाणी वेळेत न पोचता पोलिसी जबाबदारीकडे दुर्लक्ष केल्याप्रकरणी दोन बीट मार्शल पोलिस शिपायांना निलंबित करण्यात आले आहे. गुन्हे शाखेचे पोलिस उपायुक्त निखिल पिंगळे यांनी याबाबतचे आदेश दिले आहेत. कारवाई करण्यात आलेले पोलिस शिपाई हडपसर पोलिस ठाण्यात कार्यरत आहेत.
मुकुंद जयराम शिंदे आणि विजय हरिभाऊ पोटे अशी निलंबित करण्यात आलेल्या पोलिस कर्मचाऱ्यांची नावे आहेत. शनिवारी (ता. २५) रात्री साडेअकरा वाजता ‘डायल ११२’ वरून एस. के. रेसिडेन्सी हॉटेल, १५ नंबर चौक, हडपसर येथे वेश्याव्यवसाय सुरू असल्याची तक्रार पोलिसांकडे आली होती. त्यावेळी दोन्ही शिपाई रात्रपाळीवर कर्तव्यावर होते. मात्र, फोन आल्यानंतर त्यांनी तत्काळ घटनास्थळी पोहोचून तपासणी केली नाही. फोनचे गांभीर्य ओळखून आवश्यक ती कारवाई न केल्याने पोलिस दलाची प्रतिमा मलिन झाल्याचे आदेशात नमूद करण्यात आले आहे.