पुणे, ता. २९ : ‘कर्ज मिळवून देतो आणि नोकरी लावतो’ असे सांगत मित्राचे कागदपत्र घेत त्याआधारे घेतलेले सिमकार्ड कुख्यात गुंड नीलेश घायवळ टोळीतील एका सदस्याने काही गुन्ह्यांत वापरल्याचे निष्पन्न झाले आहे. हा प्रकार उघडकीस आल्याने तरुणाने वारजे पोलिस ठाण्यात फिर्याद दिली आहे. त्यानुसार घायवळ टोळीतील सदस्यावर गुन्हा दाखल केला आहे.
अमोल दत्तात्रेय लाखे (रा. धाराशिव) असे गुन्हा दाखल केलेल्याचे नाव आहे. याबाबत सुरेश जालिंदर डेंगळे (वय ३२, रा. पारा, ता. वाशी, जि. धाराशिव) यांनी फिर्याद दिली आहे.
नीलेश घायवळ आणि त्याच्या टोळीवर दाखल असलेल्या गुन्ह्याच्या अनुषंगाने डेंगळे यांना वारजे माळवाडी पोलिसांनी चौकशीसाठी बोलावले होते. पोलिसांना चौकशीत समजले की, डेंगळे यांच्या नावावर असलेला मोबाईल क्रमांक लाखे वापरत आहे. लाखे याने डेंगळे यांच्या कागदपत्रांच्या आधारे सिमकार्ड घेतले आहे. तो नंबर काही बँक खात्यांशी संलग्न केला आहे.
पोलिसांनी दिलेल्या माहितीनुसार, फिर्यादी आणि लाखे मित्र आहेत. २०१९ मध्ये लाखे याने फिर्यादी यांना ‘मी तुला शेती आणि व्यवसायासाठी कर्ज काढून देतो. पुण्यात माझ्या ओळखी आहेत. तू कागदपत्रे घेऊन ये. तुझ्या नोकरीबद्दल मी माझा मित्र नीलेश घायवळ याला बोललो आहे,’ असे सांगितले. त्यानुसार फिर्यादीनी त्यांची कागदपत्रे लाखे याला दिले. लाखेने डेंगळे यांच्या कागदपत्रांच्या आधारे सिमकार्ड घेऊन ते काही गुन्ह्यात वापरले आहेत.