पुणे, ता. ३१ : अजित पवार गटाच्या रूपाली पाटील ठोंबरे यांच्याबाबत फेसबुकवर पोस्‍ट केल्याचा राग मनात धरून एका महिलेच्या घरात घुसून तिला मारहाण केल्याची घटना गुरुवारी (ता. ३०) सायंकाळी शुक्रवार पेठेत घडली. याप्रकरणी खडक पोलिस ठाण्यात तीन महिलांसह एक पुरुष अशा चौघांवर गुन्हा दाखल करण्यात आला आहे.
याबाबत माधवी मंदार खंडाळकर (वय ४२, रा. शुक्रवार पेठ) यांनी फिर्याद दिली आहे. त्‍यानुसार आरोपी प्रिया अमित सूर्यवंशी (वय ४३, रा. आंबेगाव), वैशाली चंद्रशेखर पाटील (वय ५५, रा. शुक्रवार पेठ), पूनम काशिनाथ गुंजाळ (वय २८) आणि अमित सूर्यवंशी (वय ४५, रा. आंबेगाव) यांच्‍यावर पोलिसांनी गुन्‍हा दाखल केला आहे.
खडक पोलिसांनी दिलेल्या माहितीनुसार, फिर्यादी खंडाळकर यांनी त्यांच्या फेसबुक खात्यावर रूपाली पाटील ठोंबरे यांच्याबाबत एक पोस्ट टाकली होती. याचा राग मनात धरून आरोपींनी त्‍यांना शुक्रवार पेठेतील त्‍यांच्‍या घरी जाऊन लाथाबुक्क्यांनी मारहाण केली. त्यात फिर्यादी जखमी झाल्या. आरोपी सूर्यवंशी याने फिर्यादी यांचा १० हजार रुपये किमतीचा मोबाईल नेल्याचे फिर्यादीत म्‍हटले आहे. यानंतर फिर्यादी खंडाळकर यांनी मारहाण केल्‍याबाबतचा व्हिडिओदेखील समाजमाध्‍यमावर प्रसारित केला. खडक पोलिस पुढील तपास करीत आहेत.