पुणे, ता. ४ : ‘एका वर्षात तुमची गुंतवणूक रक्कम दुप्पट होईल,’ असे जादा परताव्याचे आमिष दाखवून धनकवडीतील तरुणीची चार लाख ११ हजार रुपयांची फसवणूक केल्याचा प्रकार उघडकीस आला आहे. याप्रकरणी सहकारनगर पोलिसांनी सांगलीतील दोघांविरुद्ध गुन्हा दाखल केला आहे.
या प्रकरणी तरुणीने (वय २५, रा. धनकवडी) सहकारनगर पोलिस ठाण्यात तक्रार दिली आहे. मिलिंद गाडवे आणि प्रकाश चौगुले (रा. सांगली) अशी गुन्हा दाखल केलेल्या संशयितांची नावे आहेत. पोलिसांनी दिलेल्या माहितीनुसार, धनकवडीतील मोहननगर परिसरात राहणाऱ्या तरुणीची आरोपींशी ओळख झाली होती. आरोपींनी स्वतःला गुंतवणूक सल्लागार सांगत तिचा विश्वास संपादन केला. त्यानंतर ‘एका नामांकित कंपनीत गुंतवणूक केल्यास एका वर्षात दुप्पट परतावा मिळेल,’ असे आमिष दाखवत त्यांनी तिला गुंतवणूक करण्यास प्रवृत्त केले. विश्वास ठेवून तरुणीने चार लाख ११ हजार रुपये आरोपींनी सांगितलेल्या खात्यात जमा केले. मात्र, अपेक्षित परतावा तर दूरच, मुद्दल रक्कमही परत मिळाली नाही. त्यानंतर तरुणीने पोलिसांकडे धाव घेतली.
शहरात गुंतवणुकीच्या नावाखाली नागरिकांची फसवणूक करणाऱ्या टोळ्या सक्रिय झाल्या आहेत. ‘क्रिप्टो’, ‘म्युच्युअल फंड’, ऑनलाइन ट्रेडिंग’ किंवा ‘कंपनी शेअर्स’ यांमध्ये दुप्पट परताव्याचे आश्वासन देत चोरटे लाखो रुपयांचा गंडा घालत आहेत. नागरिकांनी अशा आमिषाला बळी पडू नये, असे आवाहन सायबर पोलिसांकडून करण्यात आले आहे.