पुणे, ता. १० ः राज्य सरकारच्या सांस्कृतिक कार्य संचालनालयातर्फे प्रथमच महाविद्यालयीन विद्यार्थ्यांसाठी राज्यस्तरीय एकांकिका स्पर्धेचे आयोजन करण्यात आले आहे. स्पर्धेची तालीम फेरी डिसेंबरपासून सुरू होणार असून, जानेवारीमध्ये प्राथमिक व अंतिम फेरीचे आयोजन करण्यात येणार आहे.
राज्य सरकारतर्फे गेल्या ६४ वर्षांपासून हौशी मराठी राज्य नाट्य स्पर्धांचे आयोजन केले जाते. मात्र महाविद्यालयीन विद्यार्थ्यांच्या कलागुणांना व्यासपीठ मिळावे, यासाठी सरकारने यावर्षीपासून एकांकिका स्पर्धांच्या आयोजनालाही सुरुवात करण्याचा निर्णय घेतला आहे. तालीम, प्राथमिक आणि अंतिम अशा तीन फेऱ्यांमध्ये स्पर्धा होणार असून सर्वोत्कृष्ट एकांकिकेला एक लाख रुपयांचे पारितोषिक दिले जाणार आहे. राज्याच्या सहा महसुली विभागांमध्ये प्राथमिक फेरी होणार असून मुंबईत अंतिम फेरी होईल.
स्पर्धेसाठी महाविद्यालयांकडून २५ नोव्हेंबरपर्यंत ऑनलाइन पद्धतीने प्रवेशिका मागविण्यात येत असल्याची माहिती सांस्कृतिक कार्य संचालनालयाचे संचालक बिभीषण चवरे यांनी दिली. या स्पर्धेची विहित नमुन्यातील प्रवेशिका आणि नियम संचालनालयाच्या https://mahanatyaspardha.com या संकेतस्थळावर उपलब्ध आहेत. आवश्यक त्या कागदपत्रांसह या प्रवेशिका २५ नोव्हेंबरपर्यंत सादर करायच्या आहेत. प्रवेशिकेसोबत आवश्यक असणारी कागदपत्रे जोडलेली नसल्यास किंवा संपूर्ण तपशील भरला नसल्यास ऑनलाइन प्रवेशिका भरता येणार नाही, असे चवरे यांनी स्पष्ट केले.