पुणे, ता. ११ ः अरुणा ठोसर-दीक्षित लिखित आणि मोहन माडगूळकर दिग्दर्शित ‘फिनिक्स’ या इंग्रजी नाटकाचा पहिला प्रयोग रविवारी (ता. १६) सायंकाळी ७ वाजता एरंडवण्यातील ‘द बॉक्स’ येथे सादर होणार आहे. निलीमा ही व्यक्तिरेखा या नाटकाच्या केंद्रस्थानी असून तिच्या आयुष्यातील विविध माणसे आणि त्यांच्या परस्पर गुंफलेल्या जीवनकथांमधून स्व‍त्वाचा शोध घेण्याचा तिचा संघर्ष नाटकात उलगडतो.
पुरुषप्रधान संस्कृतीचा स्त्रियांच्या महत्वाकांक्षांवर होणारा परिणाम, लग्न झाल्यानंतर रक्ताच्या नात्यांचा बदलता दृष्टिकोन, पुरोगामी विचाराच्या स्त्रियांच्या त्यांच्या जोडीदारांनी ‘पुरुष’ म्हणून कसे असले पाहिजे, याबद्दलच्या कल्पना, आदी विषयांना स्पर्श करणारे हे नाटक प्रेक्षकांना अंतर्मुख करणारे आणि आत्मपरीक्षण करण्यास भाग पाडणारे आहे. या नाटकात मोहन माडगूळकर, राधिका माडगूळकर, प्रमिती नरके, लक्ष्मी बिराजदार, अंगद पटवर्धन, सुबोध पंडे, हर्षवर्धन श्रोत्री, सचिन पंडित, सुप्रिया धोंगडे आदी कलाकारांनी भूमिका साकारल्या आहेत. नाटकाची निर्मिती ‘प्रदीप दीक्षितस् कम्युनिकेशन सपोर्ट आणि इंडिव्हिज्युअल सोशल रिस्पॉन्सिबिलिटी प्रोजेक्ट्स’ या संस्थेची आहे.