पुणे, ता. १४ : सावित्रीबाई फुले पुणे विद्यापीठाच्या विद्यार्थ्यांच्या संघाने जळगाव येथे नुकत्याच झालेल्या ‘इंद्रधनुष्य २०२५’ आंतरविद्यापीठीय युवक महोत्सवामध्ये एकूण सात पारितोषिके पटकावली. विद्यापीठाच्या एकांकिकेच्या संघाने, तसेच ललित कला गटामधील मातीकाम स्पर्धेमध्येही विद्यापीठाच्या विद्यार्थ्याने पहिले पारितोषिक पटकावले.
राज्यपाल कार्यालयामार्फत राज्यभरातील विद्यापीठांमधील विद्यार्थ्यांच्या विविध कलागुणांना वाव देण्यासाठी ‘इंद्रधनुष्य’ या आंतरविद्यापीठीय युवक महोत्सवाचे आयोजन करण्यात येते. यंदा जळगाव येथील कवयित्री बहिणाबाई चौधरी उत्तर महाराष्ट्र विद्यापीठात नोव्हेंबरच्या सुरुवातीला हा युवक महोत्सव झाला. महोत्सवाचे उद्‌घाटन अभिनेत्री श्रेया बुगडे यांच्या हस्ते झाले. महोत्सवाच्या समारोपप्रसंगी गायक आदर्श शिंदे प्रमुख पाहुणे म्हणून उपस्थित होते. महोत्सवांतर्गत रंगलेल्या एकूण २९ स्पर्धांचा पारितोषिक वितरण समारंभ झाला. महोत्सवातील एकांकिका आणि मातीकाम स्पर्धेतील प्रथम क्रमांकाबरोबरच पुणे विद्यापीठाने भारतीय सुगम गायन, भारतीय शास्त्रीय गायन आणि पाश्चिमात्य एकल गायन स्पर्धांमध्ये द्वितीय पारितोषिके पटकावली. नाट्यसंगीत आणि प्रश्नमंजूषा स्पर्धेत पुणे विद्यापीठाच्या संघाला तिसरे पारितोषिक मिळाले.