नवले पूल अपघात,
तिघांवर गुन्हा दाखल
पुणे, ता. १४ : पुणे-बंगळूर महामार्गावरील नवले पूल परिसरात गुरुवारी झालेल्या भीषण अपघातानंतर सिंहगड रस्ता पोलिसांनी कंटेनरचा मालक, चालक आणि क्लीनर अशा तिघांविरुद्ध गुन्हा दाखल केला आहे. या अपघातात आठ जणांचा मृत्यू झाला होता. त्यात कंटेनरच्या चालक आणि क्लिनरचा समावेश होता.
कंटेनरचा चालक रुस्तुम ऋद्दार खान (वय ३५, रा. किरवारी, जि. खेरतल, राजस्थान), क्लीनर मुस्ताक हनीफ खान (वय ३१, रा. मनापुरी, जि. अल्वर, राजस्थान) अशी मृतांची नावे आहेत. या अपघात प्रकरणी पोलिस उपनिरीक्षक मधुकर तौपसुंदर यांनी फिर्याद दिली आहे. त्यानुसार कंटेनरचा चालक रुस्तुम खान, क्लीनर मुस्ताक खान आणि कंटेनरचा मालक ताहिर नसीर खान (वय ४५, रा. माचा, जि. अल्वर, राजस्थान) या तिघांविरुद्ध सिंहगड रस्ता पोलिस ठाण्यात आज गुन्हा दाखल करण्यात आला. गुन्हा दाखल झालेल्यांपैकी कंटेनर चालक आणि क्लीनर या दोघांचा मृत्यू झाला आहे. कंटेनरच्या मालकास पोलिसांनी नोटीस बजावली असून, पुढील तपास करण्यात येत आहे.
कात्रजच्या नवीन बोगद्यातून भरधाव कंटेनरने गुरुवारी सायंकाळी भूमकर चौक ते नवले पुलादरम्यान एकापाठोपाठ १७ वाहनांना धडक दिली होती. त्यात मोटारीतील पाच जणांसह कंटेनर चालक आणि क्लिनरचा आगीत होरपळून जागीच मृत्यू झाला होता. अन्य एका वाहनातील जखमीचा रुग्णालयात मृत्यू झाला होता. तर, २० जण जखमी झाले आहेत.
-----