पुणे, ता. १९ : मूळ खाते सोडून प्रतिनियुक्तीवर पुणे महानगर क्षेत्र विकास प्राधिकरणामध्ये (पीएमआरडीए) ठाण मांडून बसलेल्या अधिकाऱ्यांवर अखेर प्राधिकरणाने कारवाई सुरू केली आहे. तीन वर्षांसाठी नगररचना विभागातून प्रतिनियुक्तीवर प्राधिकरणात आलेले एक सहाय्यक नगररचनाकार आणि एक कनिष्ठ आरेखक या दोघांची आयुक्तांनी पुन्हा मूळ विभागात म्हणजे नगररचना विभागात पाठवणी केली आहे.
‘पीएमआरडीए’ची स्थापना झाल्यानंतर प्राधिकरणाने इतर विभागांतील अधिकाऱ्यांची प्रतिनियुक्ती करत पदे भरली. त्यासाठी नगररचना, महसूल, लेखा विभाग आदी विभागांतील अधिकारी-कर्मचारी यांची प्रतिनियुक्ती करत कारभार करण्यास सुरुवात केली. प्राधिकरणातील बांधकाम परवानगी विभाग म्हणजे विकास शाखा यामध्ये येण्यास अनेक अधिकारी-कर्मचारी इच्छुक असतात. अशा प्रकारे प्राधिकरणात नगररचना विभागातून तीन वर्षांसाठी एक अधिकारी विकास परवानगी शाखेत आले, तर एक कनिष्ठ आरेखक हे तीन वर्षांसाठी नगररचना विभागातून प्राधिकरणात प्रतिनियुक्तीवर आले. या अधिकाऱ्यांनी तर तब्बल आठ वर्षे प्राधिकरणात सेवा बजावली. मात्र तरीदेखील या अधिकाऱ्यांना प्राधिकरणाचा मोह काही सोडवत नव्हता.
या दोन अधिकारी-कर्मचाऱ्यांविरुद्ध नागरिकांनी प्राधिकरणाचे आयुक्त यांच्याकडे तक्रारींचा पाढाच वाचला. या दोन कर्मचाऱ्यांबद्दल आयुक्तांनी माहिती घेतल्यानंतर तीन वर्षे उलटूनही हे दोन्ही अधिकारी येथेच कार्यरत असल्याचे दिसून आले. त्यामुळे आयुक्तांनी या दोन कर्मचाऱ्यांची घरवापसी करीत त्यांना मूळ विभागात पाठवणी केली.