पुणे, ता. १९ ः ‘‘निसर्गसंवर्धन क्षेत्रातील स्त्रियांचे योगदान अतिशय महत्त्वाचे आणि मूलगामी आहे. माझा​ वनखात्यातील​ सुमारे २० वर्षांचा अनुभव बघता वनसंवर्धनाची जवळपास ५० टक्के जबाबदारी स्त्रियाच पेलताना दिसतात, पण निसर्ग किंवा वनसंवर्धक म्हणून स्त्रियांच्या योगदानाची दखल समाजाने उशिरा घेतली,’’ या वास्तवाकडे पुण्याचे मुख्य वन संरक्षक एन. आर. प्रवीण यांनी लक्ष वेधले.
वन्यजीव संवर्धक भावना मेनन यांना वन्यजीव संवर्धन क्षेत्रात उल्लेखनीय कामगिरीसाठीचा पहिला ‘जंगल बेल्स’ पुरस्कार ​एन. आर प्रवीण यांच्या हस्ते प्रदान करण्यात आला, त्या वेळी प्रमुख पाहुणे म्हणून ते बोलत होते. या वेळी संजीवनी समूहाचे संजय देशपांडे, जंगल बेल्सच्या हेमांगी वर्तक आणि भावना मेनन व्यासपीठावर उपस्थित होत्या. रोख ५० हजार रुपये आणि मानपत्र असे या पुरस्काराचे स्वरूप आहे.
एन. आर. प्रवीण पुढे म्हणाले, ‘‘आता स्त्रिया जंगल सफारीमध्ये ड्रायव्हिंग, गाइड, नॅचरलिस्ट, रेंजर, सुरक्षारक्षक अशा प्रत्येक क्षेत्रात अग्रेसर आहेत. संवेदनशीलतेने आणि प्रभावी कार्य ​करताना त्या दिसतात, पर्यटकांशी परिणामकारक संवाद साधतात. मात्र, त्यांच्या या योगदानाची योग्य ती दखल समाजाने फार विलंबाने घेतली आहे, या पार्श्वभूमीवर मेनन यांना हा पहिला जंगल बेल्स पुरस्कार ​मिळतो आहे, हे महत्त्वाचे आहे.’’
मेनन म्हणाल्या, ‘‘निसर्गसंवर्धनाचा उद्देश आता प्रत्यक्ष जंगलात व्याघ्र प्रकल्पाजवळ राहणाऱ्या समाजगटांपर्यंत अधिकाधिक पोहोचण्याचा प्रयत्न असा अपेक्षित आहे. इको टुरिझममुळे या समाजघटकांचे उत्पन्न वाढेल, हे गरजेचे आहे. शहरी भागातील पर्यटकांचे जंगलप्रेम आता जंगल सफारीच्या पलीकडे जाणे आवश्यक आहे. प्रत्यक्ष जंगलवासींशी संवाद, त्यांना सोबत घेऊन काम हे आता महत्त्वाचे आहे.’’
सुनील लिमये, नरेश झुरमुरे, अनुज खरे या समितीने मेनन यांची या पुरस्कारासाठी निवड केली. संजय देशपांडे यांनी पुरस्कार सुरू करण्यामागील भूमिका मांडली. हेमांगी वर्तक यांनी मानपत्राचे वाचन केले. मधुलिका तिजारे यांनी सूत्रसंचालन केले.