पुणे, ता. १२ : जिल्हा परिषद आणि पंचायत समिती सदस्यांसाठी सोमवारी (ता.१३) आरक्षण सोडत जाहीर होणार आहे. आरक्षण जाहीर झाल्यानंतर इच्छुकांकडून खऱ्या अर्थाने तयारीला सुरुवात करण्यात येणार आहे. जिल्हाधिकारी जितेंद्र डुडी यांच्या अध्यक्षतेखाली जिल्हा परिषदेतील ७३ सदस्य पदाकरिता आरक्षण सोडत दुपारी बारा वाजता जिल्हाधिकारी कार्यालयात होणार आहे.
पंचायत समिती सदस्य पदांकरिता आरक्षण सोडतीचे संबंधित तालुक्यात आयोजन करण्यात आले आहे. जिल्हा परिषद व पंचायत समिती क्षेत्रात सभा घेऊन अनुसूचित जाती, अनुसूचित जमाती, नागरिकांचा मागासवर्ग प्रवर्ग व त्यामधील स्त्रियांसाठी राखून ठेवावयाच्या जागा आणि सर्वसाधारण स्त्रियांसाठी राखून ठेवावयाच्या जागा निश्चित होणार आहेत.