पुणे, ता. १० : छत्रपती शिवाजी महाराज यांच्या ३५२व्या शिवराज्याभिषेक दिनानिमित्त रायगडावर छत्रपती शिवाजी महाराजांच्या पुतळ्याला विविध संस्थांच्या वतीने सुवर्ण पिंपळ बीजाभिषेक करण्यात आला. याबाबतची माहिती बायोस्फिअर्सचे अध्यक्ष डॉ. सचिन पुणेकर यांनी पत्रकार परिषदेत दिली.

पुणेकर म्‍हणाले की, ‘‘बीजाभिषेकात वापरलेले बीज हे आळंदीतील मूळ सुवर्ण पिंपळाचे असून ते संकलित करून महाराष्ट्र व देशभर शिवबीजप्रसाद म्हणून सर्वांना वाटण्यात येत आहे. नागरिकांनी जास्तीत जास्त ठिकाणी या बीजापासून रोपांची निर्मिती करून देशातील हिरवाई वाढवावी, असा यामागचा उद्देश आहे.’’ या अनोख्या सोहळ्यानिमित्त रायगडावर बायोस्फिअर्स संस्था, कोकण कडा मित्रमंडळ रायगड, शिवराज्याभिषेक दिनोत्सव सेवा समिती दुर्गराज रायगड, श्री ज्ञानेश्‍वर महाराज संस्थान कमिटी, माउली हरित अभियान : मूव्हमेंट अगेन्स्ट बायोलॉजिकल इनव्हेजन (मावि) यांच्या संयुक्त विद्यमाने बीजाभिषेक झाला.

या प्रसंगी डॉ. सचिन पुणेकर, कोकण कडा मित्रमंडळाचे परेश सोनावणे, नितीन सकपाळ, तेजस पवार, प्रकाश राजपुरोहित, सुधाकरमहाराज इंगळे, अमित पायगुडे यांच्या हस्ते व इतर शिवप्रेमींच्या उपस्थितीत हा बीजाभिषेक सोहळा संपन्न झाला.