पुणे, ता. १२ : मूळ दस्ताच्या कागदपत्रांमध्ये बदल करण्यात आला असल्याचा आखणी एक प्रकार उघडकीस आला आहे. या प्रकरणी नोंदणी व मुद्रांक शुल्क विभागाने तक्रार देऊनही पोलिसांकडून कोणतीही कारवाई होत नसल्याचा आरोप सुनील कुलकर्णी यांनी पत्राद्वारे केला आहे.
कोथरूडमधील सर्व्हे नंबर ११३ या जागेच्या १९६५ मध्ये झालेल्या दस्ताच्या मूळ प्रतीची कुलकर्णी यांनी नोंदणी व मुद्रांक शुल्क विभागाकडे मागणी केली होती. विभागाकडून त्यांना मूळ प्रतीची साक्षांकित प्रत उपलब्ध करून देण्यात आली. त्यातील अनेक पाने गहाळ असल्याचे, तसेच दस्तावर स्वाक्षऱ्या नसल्याचे आढळून आले. या संदर्भात कुलकर्णी यांनी नोंदणी व मुद्रांक शुल्क विभागाकडे तक्रार केली. त्या तक्रारीच्या अनुषंगाने विभागाकडून करण्यात आलेल्या चौकशीमध्ये तथ्य आढळून आले. ही गंभीर बाब लक्षात घेऊन विभागाकडून स्वतंत्र चौकशी समिती नेमण्यात आली. त्या समितीने केलेल्या चौकशीत तक्रारीत तथ्य असल्याचे आढळून आले. त्यामुळे या प्रकरणी अज्ञात व्यक्तीविरोधात तक्रार दाखल करावी, असे पत्र नोंदणी विभागाने पोलिसांना दिले. मात्र अद्याप कोणतीही कार्यवाही झालेली नाही, असा दावा कुलकर्णी यांच्याकडून करण्यात आला आहे.