पुणे, ता. १४ : जागतिक ज्येष्ठ नागरिक छळ प्रतिबंध जनजागृती दिनानिमित्त विशेष कार्यक्रमाचे आयोजन करण्यात आले आहे. यामध्ये ज्येष्ठ नागरिकांच्या विविध समस्या, त्यांच्यावर होणारा अन्याय, छळ, मानसिक, शारीरिक आणि भावनिक खच्चीकरण आदी समस्या आणि त्यावर उपाययोजनांबाबत जागरूकता निर्माण करण्यात येणार आहे. मंगळवारी (ता. १७) कोथरूडमधील यशवंतराव चव्हाण नाट्यगृह येथे सकाळी दहा वाजता हा कार्यक्रम होणार असल्याची माहिती जनसेवा फाउंडेशनचे संस्थापक अध्यक्ष डॉ. विनोद शहा यांनी पत्रकार परिषदेत दिली. जनसेवा फाउंडेशन पुणे, महाराष्ट्र ज्येष्ठ नागरिक संघ पुणे (फेस्कॉम), मध्यवर्ती ज्येष्ठ नागरिक संघ पुणे (अॅस्कॉप), नवचैतन्य हास्ययोग परिवार, एकता योग ट्रस्ट, हेल्थ पेज इंडिया यांच्यातर्फे हा कार्यक्रम आयोजित करण्यात आला आहे.