पुणे, ता. २४ : ‘‘सध्या डिजिटल जगात पुस्तकांच्या परंपरेवर, त्यांच्या अस्तित्वावर शंका घेतली जाते. प्रत्यक्षात मात्र पुस्तकांची विक्री मोठ्या प्रमाणात होताना दिसते. पुस्तकांची विक्री करणारी दुकाने आणि त्यांची वाढणारी संख्या पाहिली की, पुस्तके संपतील याविषयी काळजी करण्याचे कारण नाही. वाचकांचा ओढा पुस्तकांकडे दिवसेंदिवस वाढतोच आहे. त्यामुळे पुस्तके नेहमीच टिकून राहतील,’’ असे मत अभिनेते किशोर कदम यांनी व्यक्त केले.
‘अक्षरधारा’ आणि ‘राजहंस प्रकाशनतर्फे’ टिळक रस्त्यावरील आचार्य अत्रे सभागृहात आयोजित पुस्तकांच्या मान्सून महोत्सवाचे उद्‍घाटन नुकतेच उत्साहात झाले. त्यावेळी ते बोलत होते. हा महोत्सव २० जुलैपर्यंत खुला आहे.
यावेळी पुणे पुस्तक महोत्सवाचे संयोजक आणि ‘राष्ट्रीय पुस्तक न्यास’चे विश्‍वस्त राजेश पांडे, अखिल भारतीय साहित्य महामंडळाचे अध्यक्ष आणि महाराष्ट्र साहित्य परिषदेचे कार्याध्यक्ष प्रा. मिलिंद जोशी, ‘राजहंस’चे संपादक शिरीष सहस्रबुद्धे, ‘अक्षरधारा’चे रमेश राठिवडेकर, रसिका राठिवडेकर आदी उपस्थित होते.