पुणे, ता. १ ः कोथरूड भागात सदनिकेचे कुलूप तोडून चोरट्यांनी १७ लाख २० हजार रुपयांचे सोन्याचे दागिने लांबविले. याबाबत एका महिलेने कोथरूड पोलिस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार महिला कोथरूड भागातील उजवी भुसारी कॉलनीतील व्यंकटेश्वरा अपार्टमेंटमध्ये राहायला आहेत. चोरट्यांनी शनिवारी (ता. ३१) मध्यरात्री बंद सदनिकेचे कुलूप तोडले. शयनगृहातील कपाट उचकटून सोने-चांदीचे दागिने, तसेच हिरेजडीत दागिने असा १७ लाख २० हजार रुपयांचा ऐवज चोरला. पसार झालेल्या चोरट्यांचा पोलिसांकडून माग काढण्यात येत आहे. व्यंकटेश्वरा अपार्टमेंट परिसरातील सीसीटीव्ही चित्रीकरण पोलिसांनी तपासले असून सहायक पोलिस निरीक्षक बालाजी सानप तपास करत आहेत.