पुणे, ता. १२ : वडगाव शेरी येथील एका जमीन प्रकरणात ज्येष्ठ महिलेची फसवणूक झाल्याच्या तक्रारअर्जावर सुनावणीनंतर न्यायालयाने चंदननगर पोलिसांना गुन्हा दाखल करण्याचा आदेश दिला आहे.
सुमनदेवी तालेरा या ज्येष्ठ महिलेने वडगाव शेरी येथील जमीन प्रकरणात त्यांची फसवणूक, विश्वासघात झाल्याबाबत ८ जानेवारी २०२४ रोजी चंदननगर पोलिस ठाण्यात लेखी तक्रार दिली होती. या प्रकरणात तत्कालीन पोलिस अधिकाऱ्याने गुन्हा दाखल करण्याबाबत शिफारस केली होती. हे प्रकरण चौकशीसाठी वरिष्ठ अधिकाऱ्यांकडे गेले. त्यांनी ११ महिन्यांनंतर ही तक्रार ‘सिव्हिल मॅटर’ असल्याचे सांगून अर्ज निकाली काढला होता. या निर्णयाच्या विरोधात तालेरा यांनी न्यायालयात तक्रारअर्ज दिला होता. त्यावर सुनावणी झाल्यानंतर न्यायालयाने बुधवारी (ता. १०) निर्णय दिला. चंदननगर पोलिसांनी याप्रकरणी त्वरित गुन्हा दाखल करून तपास सुरू करावा, तसेच तपास अहवाल ६० दिवसांच्या आत न्यायालयात सादर करावा, असे आदेशात म्हटले आहे.

या संदर्भात न्यायालयाकडून आदेशाची प्रत अद्याप प्राप्त झालेली नाही. आदेश प्राप्त झाल्यानंतर पुढील कार्यवाही करण्यात येईल.
- सीमा ढाकणे, वरिष्ठ पोलिस निरीक्षक, चंदननगर