पुणे, ता. १० : आनुवंशिक लठ्ठपणाचा परिणाम म्हणून राष्ट्रीय बॉक्सर असलेल्या १९ वर्षीय तरुणीचे वजन तब्बल १२२ किलोवर पोहोचले. वडिलांनी दशकापूर्वी केलेल्या बेरियाट्रिक शस्त्रक्रियेनंतर आता मुलीनेही तीच शस्त्रक्रिया करून केवळ आठवड्यात १२ किलो वजन कमी केले.
पुण्‍यातील ३६ वर्षीय ध्रुव यांचे वजन २०१६ मध्‍ये ११६ किलोपर्यंत वाढले होते. त्‍याचबरोबर त्यांच्या रक्तातील साखरेची पातळीही ३८० इतकी प्रचंड वाढली होती. तर उंचीशी वजनाचा समतोल मोजणीचा निर्देशांक (बीएमआय) ४६ पर्यंत गेला होता. त्यावेळी त्यांनी वजन कमी करण्‍यासाठी बेरियाट्रिक शस्त्रक्रिया केली व नंतर त्यांचे वजन ४० किलोपेक्षा कमी झाले आणि मधुमेहातूनदेखील दिलासा मिळाला. मात्र त्यांच्‍यासारखाच प्रवास मुलीलादेखील करावा लागेल, हे कदाचित त्‍यांना माहीत नव्‍हते. त्यांची मुलगी कीर्ती ही आता १९ वर्षांची असून, राष्ट्रीय स्तरावरील बॉक्सर खेळाडू आहे. मात्र गेल्या वर्षभरात तिचे वजन अनपेक्षितपणे १२२ किलोपर्यंत वाढले. त्यामुळे त्‍याचा तिची शारीरिक क्षमता, लक्ष्यभेद आणि एकंदरीत खेळाच्‍या कामगिरीवर परिणाम झाला. यामुळे तिच्या आत्मविश्‍वासावर परिणाम होऊ लागला. कीर्तीने रूबी हॉल क्लिनिक येथील बेरियाट्रिक आणि लॅप्रोस्कोपिक सर्जन डॉ. केदार पाटील यांचा सल्ला घेतला. शरीराच्या रचनेच्या सविस्तर विश्‍लेषणातून तिचे वजन वाढणे हे स्नायूंमुळे नव्हे तर अतिरिक्त चरबीमुळे वाढल्‍याचे दिसून आले. कीर्तीवरही ९ जून रोजी ‘लॅप्रोस्कोपिक स्लीव गॅस्ट्रेक्टोमी’ ही वजन कमी करण्‍याची प्रक्रिया करण्यात आली.

आनुवंशिकता, जीवनशैली आणि वातावरणीय घटक एकत्र येऊन याचा परिणाम विशेषतः तरुण रुग्णांवर कसा होतो हे यातून दिसून येते. बेरियाट्रिक शस्त्रक्रिया ही केवळ वजन कमी करण्यासाठीच नव्हे तर चांगले आरोग्य, आत्मविश्‍वास आणि जीवनमान पुन्हा मिळविण्यासाठीदेखील उपयुक्त आहे. या शस्त्रक्रियेनंतर केवळ आठ आठवड्यांत कीर्तीचे वजन १२ किलोने कमी झाले व ती आणखी मानसिकदृष्ट्या कणखर झाली आहे.
- डॉ. केदार पाटील, बेरियाट्रिक आणि लॅप्रोस्कोपिक सर्जन, रुबी हॉल क्लिनिक