पुणे, ता. १२ : नागपूर विभागासह सर्व बोगस शालार्थ आयडी प्रकरणाची चौकशी विशेष चौकशी समितीकडे वर्ग करावी, यासह अन्य मागण्यांबाबत सकारात्मक विचार केला जाईल, असे आश्‍वासन शालेय शिक्षणमंत्री दादा भुसे यांनी सर्व शिक्षणाधिकाऱ्यांना दिले. शालेय शिक्षण मंत्र्यांच्या आश्वासनानंतर अखिल महाराष्ट्र शिक्षण सेवा राजपत्रित अधिकारी संघाने गेल्या आठवड्यापासून सुरू केलेले बेमुदत सामूहिक रजा आंदोलन अखेर मंगळवारी स्थगित केले.
राज्यातील शिक्षणाधिकाऱ्यांच्या संघटनांचे पदाधिकारी, सर्व शिक्षण संचालक, सहसंचालक, उपसंचालक यांच्या शिष्टमंडळाने शालेय शिक्षणमंत्री दादा भुसे, शिक्षण विभागाचे प्रधान सचिव रणजित सिंह देओल यांच्याशी चर्चा केली. या चर्चेनंतर संघटनेने आंदोलनाला स्थगित दिली. या बैठकीत विना चौकशी कोणत्याही अधिकारी कर्मचारी यांना नियमबाह्य अटक करू नये, शालार्थ प्रकरणी निलंबित झालेले सर्व अधिकारी यांना सेवेत पुनर्स्थापित करण्यात यावेत, अतिरिक्त कामांचा ताण आणि कार्यालयीन वेळेव्यतिरिक्त होणाऱ्या बैठका, अशा विषयांवर देखील चर्चा करण्यात आली.
शिक्षण अधिकाऱ्यांच्या संघटनेच्या मागण्यांचे निवेदन पोलिस विभागाला शासन स्तरावरून देण्यात येणार आहे. कोणत्याही निरपराध अधिकारी कर्मचारी यांच्यावर चुकीची कारवाई होणार नाही, असे आश्‍वासन भुसे यांनी दिल्याचे संघटनेच्या वतीने सांगण्यात आले आहे. आगामी काळात शिक्षण विभागातील अधिकारी आणि कर्मचारी यांना अशा प्रकारची विनाचौकशी नियमबाह्य पद्धतीने अटक झाल्यास कोणतीही पूर्व सूचना न देता स्थगित केलेले आंदोलन पुन्हा सुरू केले जाईल, असा इशाराही अखिल महाराष्ट्र शिक्षण सेवा राजपत्रित अधिकारी संघाच्या वतीने देण्यात आला. त्यामुळे सर्व शिक्षणसेवा राजपत्रित अधिकारी कर्मचारी यांनी बुधवारपासून (ता. १३) पूर्ववत कामावर रुजू व्हावे, असे आवाहनही संघाने केले आहे.