पुणे, ता. १२ : कौटुंबिक तसेच वैवाहिक वादातून विवाहितेने कालव्यामध्ये उडी मारून आत्महत्येचा प्रयत्न केला. मात्र, पर्वती दर्शन पोलिस चौकीच्या बीट मार्शलवरील पोलिसांनी या महिलेचे धाडसाने प्राण वाचविले. ही घटना सोमवारी रात्री साडेअकराच्या सुमारास स्वातंत्र्यवीर सावरकर चौकात घडली.
बीट मार्शल किरण पवार आणि राहुल उनाळे यांनी महिलेचे प्राण वाचविले. पवार आणि उनाळे हे पर्वती बीटवर पेट्रोलिंग करत होते. स्वातंत्र्यवीर सावरकर चौक भागातील कालव्याजवळ एका महिला संशयास्पदरीत्या उभी असल्याचे दिसले. तिची हालचाल पाहून त्यांनी तिला हटकले. ती बोलण्याच्या मनःस्थितीत नव्हती. तेव्हा पोलिस कर्मचारी तिच्याकडे जात असतानाच तिने कालव्यामध्ये उडी घेतली. महिलेचा जीव धोक्यात असल्याचे लक्षात येताच पवार यांनी क्षणाचाही विलंब न करता थेट पाण्यात उडी घेतली. पाण्याच्या वेगात महिला सुमारे १०० मीटर वाहत गेली. दुसरीकडे उनाळे यांनी कालव्याच्या काठाने धावत जाऊन पवार यांना मदत केली. पवार यांनी पाण्यात वाहत जाणाऱ्या महिलेपर्यंत पोचून तिला पकडले आणि काठाजवळ आणले. उनाळे यांनी त्यांना हात देत पाण्याबाहेर काढले. पतीसोबतच्या वादविवादातून तिने मानसिक तणावातून टोकाचे पाऊल उचलल्याचे प्राथमिक चौकशीत उघड झाले आहे.